羊角洞—南嵩巖初驢徒步

→羊角洞—南嵩巖初驢徒步路線圖←
昨日ㄦ晏界扣上班還垃㙮瞇癡叻，聽着窗門䈳ㄦ裡玻璃俾打得嘀嚦礡咯，陣雨落个一㴬，便忖着上個禮拜日ㄦ走外頭野个事幹。
其實籌劃箇物事也蠻長久爻，起因是太后換到新單位，碰着一隻綽號噢仔「志願者」个強驢，是市裡蠻有名頭个野外徒步組織人。野外徒步物，一般選个山頭冷道，上嶺落嶺，自有一番味道。所以我便嗅箇氣道積極響應講要去。
起先聽講是要走迲環太平線路，沿箇近瑲兩年妝起个遊步道，從元寶山繞城關南向山裡過，一直走到石夫人頭止。路裡充來要穵四㙮坡，元寶山、大尖頭、湖漫山搭石夫人峰。志願者講等天架涼起爻再到爬迲，當然是到瑲朞也還朆去，否則我箇記个標題便是檞某「環太平四嶺頭××××」之類个物事爻。
接落來，反正辰光過迲快險，眼擊䀫便是上隻禮拜爻，也便貤替眼擊䀫是箇隻禮拜爻，長假在望，貤𠡒遠叻一記。總之物，是上禮拜，志願者貤講禮拜日ㄦ要到爬樂清羊角洞附近个雙龍谷—南嵩巖路線。太后搭我當然是支持个，附帶響應个有八姐搭小強。隨底走路線概況搜搜相，結果圖片望迲難度都相當大，後慢發現我侇選个路線也蠻有難度个，個是事後話。
禮拜六是落雨天架，我等垃群裡向討論來討論去，噢，㙮補充一句，群裡太后是獨大，太后藉果撥打彈爻活動基本便嘸何某講湊个。八姐講太后絕對熬弗牢个，我也講難度蠻大，太后箇朞便有眼怯嚇了，末腳也朆形成唕物事定論，只講好集合个宕地垃新車站，反正走起還要望天架个。並且走也弗可能選擇志願者路線，危險係數老實超綱爻，只能放渠鴿子。當日晏界我撥一次性油衣、針織手套許物事準備端正，但是心裡也感覺箇垡貤要㳹肚。
第二日ㄦ我還在沃眠床頭瞇癡叻，聽着外向有落雨響聲，過一刻ㄦ貤睏轉栲。再眼瞠迲便望着太后短信發來講小強上車爻，我等也好準備起。滾打爬起便䠥新車站去，結果比小強早到，溘得箇種事幹一般都會是我早到个。裡慢貤撥小強領來走到北山車站。討信班車赫曉得嘸直達个，太后只好噢八姐來開車。
                
                
                
                
赫便是等車个時間，買早个買早，備水个備水。垃駛車个路裡也嘸檞某好講，快到樂清界我垃亂捺相機，八姐還忖有攝像頭，緊張个一瑲。走進景區大約摸快十點爻，用早垡鬥起个買仔門票，上山有纜車，眼㳹料路貤个貴，直接懶恤伊，四人眾一徑爬上。
扣枯星有雨落爻，山頭還雲霧層層，風吹靄開，風移靄斂，方山平頂垃裡向隱動，垃雨汽个空隙㙮一眾佛道洞天影影幢幢，望弗真實。羊角洞景區搭方山景區是相互獨立个，羊角洞景區只是方山个南麓一隻角落頭，要上到方山平臺還要另解門票湊。本質上羊角洞屬於宗教景點，搭雁蕩山本部个靈峰蠻像，遊客也以點香為多，望景色个話還進方山景區好。
                
                
                
                
上到雲汽下柢，蠻有騰雲駕霧个錯覺。望箇霧大地隰，大綱人也朆忖起講坐定要涉險。四個在羊角洞來來去去，上到方山頂要重新買門票，果斷放棄。走落來在垃將軍洞邊裡，小強望遠鏡拕出劍巖候望，也覅得有發現何某怪獸朆。便替走个旋轉，感覺嘸頭軑得猛，赫忖到走徒步線路。還好太后以早撥人家硬拔拔迲，穵過峨嵋山—方山（羊角洞）—南嵩巖，對路線稍為有內存。
                
                
                
                
                
                
徛箇將軍洞邊裡箇片懸崖單邊个小屋ㄦ腳ㄦ裡，四個都躊躇長界。太后在㙮分析个一界路徑，我等還是決定冒險一垡。巖皮頭灰灰色ㄦ个苔迫及滿，我着來个鞋貤鞋底隰猛險，踏到上頭基本徛弗牢。只好順箇懸崖邊界箇㙮積起个山土、植被上頭過迲。嚓老實是寸沿寸鋒，步加步小心爻貤小心沿過迲个，瑲朞忖轉來，箇一小段路老實怯嚇个。
等到過箇一段便是早日ㄦ个路道爻，有許石板鋪起，有許只是爛泥地，但是雨落過爻箇石板踏起完全嘸爛泥地穩妥。箇段路也是相當磨人个，垃我嘸較要緊躀一跤之後，四個頭都做勁做起走。軑路雖即石階鋪得蠻好个，但是講老實峻，單邊貤一眼懸零擺落。也算講是有驚無險个撥段路消費爻，走到相對弗滑澾个泥路，路裡我根本嘸膽相機拕起拍照，只嚇一記弗當心整個人隰下坦栲。
爛泥路裡未朆走多少時長，有人箇記嗄起。原來頭先有一間坍爻个磚房，裡向豎个一尊面色悽白ㄦ个神像，打眼擊望，溘得有人徛沃撥我許盯牢望樣个。驚嚇過後，繼續趒路。赫物替若有一瑲嘸較何某話講。到箇一隻小山嶺頭，小強弟弟還上迲候擺肌肉剖勢（pose），照拍起暗得望弗清爽，因為還雲糊蕩蕩在㙮。
                
                
繼續走，路裡還硏究个一朞地皮焦炭樣个樹葉ㄦ是枯爻个，還是着爻个。後慢碰着一隻甿坑樣个石棚，單邊便是瞭望臺，弗識是要開闢新景點還是怎兒。兩邊山水風景好看是好看，但是欠眼奇象，忖忖應該弗可能有唕某擴展可能性个。偏東北位置還有一隻山頭，腦頂位置有一隻明顯个洞，「山有小口，彷彿若有光。」轉迲鴣鴣搭百度地圖聚隊姘起望，像煞名字是烏龜石頭，搜搜貤嘸進一步訊息，只好作罷。
                
                
過一瑲，綢密綢密ㄦ、塕細塕細个雨花濛居然嬲上前爻，於是撥一次性油衣擊分，大綱人都着起。一路經過採石場許宕地，路途用石板鋪起蠻光趟个，苔生得弗旺，望來都蠻新，人氣多如羊角洞走東檞㙮。我搭強強垃前頭開路，油衣只包得牢上身，山頭許簇生个茅草、筻竹鬚、蘆葦撥褲搭鞋揩起汙濫。中途還在一間新起个石頭屋裡向休整个一朞，裡頭野炊个物事規規板板个擺垃㙮ㄦ，還有啤酒囥沃。
                
                
再落迲基本便是落嶺个範子，南嵩巖个景區範圍已經揩揩爻。但是到嵩巖講寺个路道貤開始隰隰動倈爻，比羊角洞扣落來㙮還要孬走。檞邊走弗牢還好踏邊裡个黃泥，㙮ㄦ石階高於山地，根本嘸宕地落腳，只用手綰眼牢樹木。沿路松毛古樹高插入雲，雨後个空氣帶眼濫溚溚个水汽味道，石階雖即講滑溜鰻樣个，落上頭个松針、野果也蠻有趣相。只講有趣是有趣，踏牢基本好哱哱𨀤叻。
                
                
侹直拔軑朝落，經過嵩巖講寺，幾隻癩皮狗徛在門口，一個老孺人隑㙮捉我侇望兩眼，貤自顧自忙栲，弗溘得羊角洞懷邊樣个，只喖嚨迱迲噢人來點香。小強講伊嚇狗个，划算後縮，結果我搶先埋渠後髖爻。再走嘸幾步便是回龍橋水庫，四個山路走路做勁做長久爻，僵堤壩裡嬉蠻多時長。水庫水清𤁽𤁽个，風吹來漾漾動，藍綠个顏色搭影子層層疊疊。
                
                
                
                
太后講箇塘堤㙮是燒烤聖地，我忖着原先公司組織个活動，也在南嵩巖景區燒烤个，垃圾𢯫起一天世界。雖即景區名義上講禁止燒烤，但是真个有人走來，貤弗拔牢个。
休憩一界，物事啃啃，大綱人貤起身爻。太后估計喫力險，心切切要落山，搭八姐只走走頭前栲嘸影爻。我僵龍勥門（龍䂻門）拍个一長界，只怨相機忒推扳，拍出个嘸何某美感。傳說龍僵㙮ㄦ䂻過，既然是雁蕩餘脈，要物䠥大龍湫檞邊栲嘸數。一路景色上加好，便是意興闌珊，基本朆認真望景點。小強好像還蠻有精力，蝙蝠洞我許還爬上迲旋一朞，人靜落來聽得着裡向夜遊个聲響。
                
                
                
                
                
                
到南嵩巖景區門口，趁車到大溪，再轉車到羊角洞，撥八姐个車取轉來。箇記已經晏界三點多爻，到㙮ㄦ，初驢徒步行程完滿結束。方山南麓已經絡明爻，山巖紋理望迲都是縋落个鹹魚鯗，四個都講是仙人曬魚。
                
                
太后後慢講起，其實完全是為小強同學已經走出爻，否則估計都爛屋裡睏懶覺。又及，其實箇趟我侇還忖撥志願者放鴿子爻，咸曉得渠侇望天架㖔，攏共朆去。又又及，八姐原先弗是噢仔八姐个，為渠箇趟拍起个照人是內八，赫得到一隻新綽號。又又又及，按照志願者對「峨嵋山—方山（羊角洞）—南嵩巖」徒步線路定性為「初驢」个判斷標準，我侇十二里估計頂多算「半初驢」，但是山路替隰，也算講增加爻難度，於是自冠「初驢」罷。
人生無味同嚼蠟，我心如初驢徒步～流水賬，是記也。