玉蜻蜓——看龙船
演出：蒋月泉、朱慧珍
（表）金张氏，一带勿带，今年已经三十二岁。为仔男人金贵升出去仔勿转勒，屋里向实在昏闷。叫啥今朝五月端午，娘娘就勒浪水墙门楼浪向要看龙船则。倷想格水墙门共总八间勒，上头八间，下头八间，十六间只有俚一官仔看龙船。半边阿妈娘姨有是有格，才是陪客，正主只有俚一官仔。朆晓得等到吃过饭，南濠街浪向格人啊，热昏么好则。搭格潮水什梗勒涌得来，“嚯落……”顶顶作孽么格两个女人则，轧得来，好么自家也勿好，格么格种轧头里么倷就安逸点则呀，搀仔阿大，抱仔阿二，背心浪还要驼个阿三。哪么有种男人么也勿好，蛮空格场化倒喊勿走，叫得格面有个女人，格外轧点笃。格个名堂叫做轧，做得像煞轧。年纪大点格老太滚勒地浪，搀也呒拨人搀。哪么有两个女人抬起头来看见金大娘娘水墙门楼么，阿要说格啦，哪哼俚笃能格惬意？大家是一家人家格当家人，俚笃不过该两个铜钿，伲能格轧呢？金大娘娘听见则。格听勒浪到底倷格龙船也看勿落。娘娘想横竖下头八间头空勒浪，马上关照男底下人，拿沿河格长窗蜕脱，摆好长凳，台子浪向么粽子、馒头、还有四茶缸茶。关照是女才好进来，男人勿许进来，啥体？要来搅枪头该！要弄勿清爽格。叫啥等到下头统统才摆好舒齐，金大娘娘对下头一看么，一个人也呒拨人进去。格种女人走过仔，对里向望望么才勿敢进去。啥体么？格个排场摆煞格，台浪向粽子勒，馒头勒，当仔卖铜钿勒，当仔赶节场勒！哪么娘娘关照丫头，说去交代看门周青笃家小周陆氏，去揽揽生意看。叫头难头难，第一个有人进来，后头就有人跟进来则。
丫鬟：（表）丫头要紧到下头，（白）嫂嫂啊！
周陆氏：哎呀，妹子啊！
丫鬟：娘娘关照倷揽揽生意看！
周陆氏：揽揽生意啊？
丫鬟：女格才好进来，男格勿许进来哦！
周陆氏：为啥介？
丫鬟：啊呀呀，金睛鱼缸里弄条黑鱼精么要弄勿清爽则呀！
周陆氏：哦，有数脉则喂！
丫鬟：揽揽生意看哦！
周陆氏：哦，晓得。（表）周陆氏也响勿落呀，叫啥覅铜钿还要揽生意来。等仔半日么实头一个也呒拨进来呀。一看么，关面过来个老太。覅去管俚，头难头难，试试看，叫得一个进来，才会得跟进来格。周陆氏过来么，（白）喂，好婆啊！
老太：哎呀，格位大娘娘。
周陆氏：哎，是呀，好婆啊，倷作啥介？
老太：哈呀，看龙船喂，作啥介。
周陆氏：噢。
老太：轧得来！
周陆氏：是呀。
老太：什梗一把年纪，懊牢出来格。
周陆氏：哪哼啦？
老太：今朝也勿知哪哼起劲呀，隔忙头里。
周陆氏：恩。
老太：要想回转去么，人只有勒浪过来。
周陆氏：是呀，轧得什梗样式，倷哪哼轧得过俚笃呢？
老太：是呀。
周陆氏：好婆啊！倷来让！
老太：啊？
周陆氏：到里向去看让！里向么轧也呒拨人轧倷，看起来么来得格清爽！肚皮饿么有粽子吃，口干么还有茶吃，进去让！
老太：哦，倷是开店娘娘。
周陆氏：勿开啥店喂！
老太：开格看龙船店。
周陆氏：哎呀，勿对嘎！伲娘娘行方便呀！覅铜钿格呀！好婆倷进来让！
老太：真嘎？
周陆氏：咸！
老太：覅遛哦！
周陆氏：哪哼啦？
老太：绢头包里统光带十四个铜钿，覅吃仔点心要算帐是要弄僵嘎！
周陆氏：喔唷，好婆倷放心让！一骨钿也覅倷格呀！
老太：噢！
周陆氏：咸！女人么才好进来格，男人么一个也勿许进来格！
老太：噢，是女才好进来格？
周陆氏：咸，进来哦！
老太：哈哈……有数脉则，有数脉则！哎呀，恩笃来啊！（表）好婆一招手，嚯哟！今朝俚跟脚浪向出来人要撒四十得来！才是女！二阿姨、三婶婶、四妹妹、六阿姐、七好婆，“嚯落……”统统才进去。叫啥真真一歇歇工夫啦，下头格个八间头，轧得实实质质。轧得哪哼？轧得筷伍塞勿落一只么我想形容则！格么人格个气总也要断快则。轧得来大膀插勿落一只么倒作兴格！真真一歇歇工夫么，台浪向粽子、馒头才搭光则，四只茶缸里已经空则。坐勒浪，长窗等到蜕脱么，看龙船来得格好！叫啥我交代格班女人进去啦，有一个人今朝亦在其中，也进去。啥人么？豆腐店里老板朱小溪格妹子，叫朱三姐，今朝亦在其中。格辰光三师太养格小囡，交待老佛婆送到金夹里，拨勒豆腐店里老板拾得去。后来吃奶奶就是吃俚格。倷想日脚阿要快？倒喊俚已经五十开外则。今朝格朱三姐替阿哥斗气，阿哥阿嫂看龙船朆喊声俚，年纪大仔啊，有剩时会得寻点气出来格。格倷喊声我么则喂，我也出两个铜钿好则，喊才勿喊，倷阿哥格辰光发痴格当口穷得来，我汰仔衣裳养恩笃一家门倷哪哼忘记咋？今朝斗气，一官仔也要去看龙船。倒喊俚一官仔看龙船。身浪向换套新衣裳么，勒浪桐桥堍买把新格扇子。十一个铜钿买把行货扇子。俚看见别人家扇子下头才有只甩勒甩格扇坠格，叫啥格朱三姐想着，划一我竹箱里也有一只勒嗨。一只石膏格蜻蜓。其实是玉蜻蜓，价值连城，俚勿识货，当俚石膏格。倘使俚晓得值铜钿，老早去变卖脱则。牛结牯结去结上去。身边么藏格几十个铜钿，甜格咸格买点吃。倒喊俚今朝出来白相，脚浪向去着双新鞋子么上当。格双鞋子小什梗一滴滴，格老皮匠格楦头朆楦足格。格拔上去格辰光硬紧拔格，到街浪一走，格个脚一热，脚涨则，而且俚有鸡眼格！噢，格个断命鸡眼难行相格。脚痛则！现在么亦在其中，到仔八间头当中去则。格脚痛倷坐定仔看龙船蛮好。叫啥真真一歇歇工夫龙船来则，“仓咚……”到金大娘娘水墙门，十五只龙船要上来朝贺娘娘。金大娘娘么放点赏，打打招，兜脱两个圈子么龙船倒喊出城，到胥门外势，胥江渡口去则。今朝还有夜色，河里向格点闲船才跟出去。金大娘娘倒喊趴勒窗口对下头八间头一看啦，格个八间头里格女人才浪散出去则，“嚯落……”来格辰光零零碎碎，现在去格辰光等当去，想勿到八间头好坐什梗性人。勿晓得金夹里男底下人哦，等到格班女格散脱以后么，俪预备也要到胥门外势去看夜色则，所以拼命勒浪收长凳。一看么，倒喊还挺一个女人。坐勒浪尽管勿走。啥人么，朱三姐。啥体勿走么，脚痛。格个脚痛倷熬仔有心走啦，不过什梗。脚痛顶顶勿好么，倷坐歇，接接力，哪倷还要想踏到地浪，格个痛叫阴心肝痛！倷坐勒浪么，格个底下人登了半边等倷只凳子呀！嘴里蛮客气格：“慢慢叫好则，慢慢叫好则。”格吃粥饭格人才懂，慢慢叫就是喊我快点。“我让倷哦！”“慢慢叫好则！”“我让倷！”“慢慢叫好则！”硬硬头皮，格只脚刚刚立到地浪，屁股齐巧离开凳子么，俚格只长凳“啪”已经抽脱格则！肩胛浪也到则。“慢慢叫好则！”人也去格则。朱三姐等到出水墙门，一看此地沿河有棵树，杨柳树。身体勒浪树浪向戤一戤，脚实在痛勿过则。叫啥俚格只脚圈起来则。起格只手，拿自家脚指头一把去捏牢，而且拼命格斟紧！啥体？倷捏紧仔，格个血脉勿和啦，让俚格痛好勿觉着，好木瑟瑟。勿晓得身浪向一有痛苦么，人觉着热劳劳则。衣裳管里格把扇子拿出来，要扇扇。眼睛呢，对河里向勒浪看，因为俚格男人吃船浪饭格，阿有男人格朋友便船过么，托俚笃带带。出点酒钿，今朝走转去行勿落则。勒浪扇（演员扇扇子）。勿晓得倷扇子勒浪扇，“姹……”下头格扇坠，格只蜻蜓“姹……”太阳光射勒浪么，光华闪烁！扇扇停停，停停么倒亦勒浪扇。
金张氏：（表）金大娘娘趴勒浪水墙门楼浪么勒浪看野眼。一看么，陆陆续续，才浪出去。走得差勿多咋！偶尔对该面一看么，哎呀！哪哼格个女人只有一只脚介？独脚大仙啊？一只脚哪哼立得直格介？噢！再一看么，一只脚圈起勒浪。戤勒浪后头树浪向。只看见女人手里向拿把扇子，格个扇坠，太阳光照勒浪光华闪烁！看上去格个扇坠值两骨钿。勿知啥么事，看看看。要想看，看勿清爽。因为俚扇急急勒浪。扇急急么，格个扇坠也甩急急。咸！等仔一歇歇，只看见把扇子复勒胸口头，格个扇坠荡勒浪，哪倒好看一看则。格要想看么，“姹……”亦勒浪扇则。咸，再等仔歇倒亦停仔下来则。哪好看咋！金大娘娘打足精神，对扇坠一看，（白）啊！（表）玉蜻蜓喂！金夹里传家之宝玉蜻蜓哪哼会得勒格女人手里？娘娘再一想，勿对。因为我一紧浪牵记小官人，阿会心悸仔勒，眼花看错？关照芳兰也来看看看。（白）啊，芳兰。
芳兰：娘娘。
金张氏：你看这妇人，手中的扇坠，什么东西？
芳兰：（表）哎呀，娘娘哪哼勒看别人家扇坠啊？倒要看看看。叫啥趴到窗畔浪对下头一看么，格水墙门楼勿高几化格，望下去碧波生清！玉蜻蜓喂！而且看见下头一蓬杏黄苏头，年数多勿过，颜色变脱格则。大爷带出去，哪哼勒了格个女人手里？（白）娘娘。
金张氏：恩。
芳兰：这是我们金家传家之宝——玉蜻蜓呀！
金张氏：噢，果然蜻蜓！
芳兰：是啊！
金张氏：（表）哪完则，实头玉蜻蜓！勿会得两个人才看错。玉蜻蜓金家传家之宝，十六年前小官人带出去格。什梗格宝贝小官人脱到手是，看上去凶多吉少。哪僵则！金夹里一家人家统统才勒我身浪，喊我哪哼弄法？叫啥金大娘娘调调小脚么，号啕痛哭。（白）噢呀！官人啦！
（唱）一见蜻蜓双足调，忆夫君血泪涌如潮。
无差是奴官人物，缘何今朝独自竟转南濠。
（表）照份理小官人回转来，带仔格只蜻蜓一淘转。倒喊现在蜻蜓勒女人手里，男人不知去向。看上去覅我格男人搭格个女人有啥往来介？（白）啊，芳兰。
芳兰：娘娘。
金张氏：（唱）这传家之宝在这妇人手，与你东人好相交。
（白）芳兰，你道可是哦？
芳兰：（表）芳兰一听，对娘娘看看，哪哼拨倷说出来格！恩笃大爷传家之宝会得拨勒格个女人勒，说看上去搭格个女人板有道理格。勿然格种么事哪哼会得脱手勒浪俚手里？芳兰对娘娘看看，倷看看格个女人看，几化年纪？五十开外则呀。就讲十六年前看俚姿色也平常。呒拨格种事体格！伲大爷阿会什梗？格么哪哼玉蜻蜓勒浪俚手里呢？芳兰想，我看啊，一定另外有一个女人，绝色佳人，才貌双全。搭格个女人认得格。伲大爷么当中横里板托俚格。（白）娘娘。
金张氏：芳兰。
芳兰：（唱）我想附近必有如花女，她是穿引金针线一条。
我们大爷是酬谢妇人这情一点，
（表）当中横里就托格个女人成功格。哪么总要拨点谢意拨俚么，就叫大爷，老虎脾气，出去朆带铜钿，喏！玉蜻蜓拨仔倷吧！所以勒浪俚手里。我看板是什梗格。
（唱）把那玉蜻蜓相谢作酬劳。
主母啊，我劝你么休悲苦，莫心焦，今朝见根能知叶和苗。
（表）伲赛过十六年前放脱一只鹞子，今朝呢，无意当中看见根鹞线则。覅哭！叫得拿根线受好俚，“得儿”一受，就好晓得格顶鹞子到底勒啥场化。伲大爷出去仔不知行踪，蜻蜓俚带出去。现在蜻蜓勒俚手里，伲就好问格个女人，倷落搭来格？大爷到底是凶是吉？格个女人到底勒啥场化，一问就晓得，倷哭就啥格用场呢？（白）娘娘，你看如何？
金张氏：这个么！（表）咸，娘娘转念头对嘎！既然现在有仔线索么应当追下去。不过现在我娘娘心里向碌碌乱，想勿出别格办法。（白）芳兰，我娘娘方寸已乱，你去与我办吧。
芳兰：遵娘娘吩咐！（表）金大娘娘心里向碌碌乱，交托拨勒芳兰，格么倷去搭我办。叫啥芳兰马上关照丫头到下头去拿周青笃家小周陆氏喊上来。指拨勒周青家小看，（白）你看，这个妇人。
周陆氏：噢，一个女人哪哼介？
芳兰：（表）头要紧覅弄错人哦，喏，戤勒树浪向，一只脚圈起格，独脚大仙什梗一个。娘娘要俚格人。覅去吓俚哦！要软骗，说鬼话，拿俚骗到对过房厅浪。娘娘有闲话要盘问俚。覅吓俚哦，一吓俚俚要勿敢讲格。千定千定勿能够吓俚。勿能放俚走啊！金夹里一家人家才勒俚身浪！（白）你可明白否？
周陆氏：嗷，有数脉则喂！
（表）说完么，芳兰替娘娘要紧下楼，两肩晚轿到对过么，丫头阿妈娘姨统统跟过去。坐到房厅浪么勒浪等格个女人。
周陆氏：（表）周陆氏也弄勿懂呀，哪哼道理娘娘看看龙船么，要起个女人来则。而且金夹里一家人家才勒格女人身浪，格倒推诿勿起哦！要拿俚骗过来哦！想好一番闲话走过来，走到俚身半边。（白）啊呀呀，大娘娘。
三姐：一看认得格，就是请我吃粽子勒馒头勒。（白）啊呀，开店娘娘！
周陆氏：喔唷，我勿开啥店喂！
三姐：阿是开看龙船店啦？
周陆氏：勿对嘎！娘娘行方便呀！
三姐：哦。
周陆氏：大娘娘，倷浪作啥介？
三姐：脚痛！
周陆氏：哦。
三姐：断命鸡眼！
周陆氏：啊呀呀。
三姐：那么我浪看河里向阿有便船过么，托俚笃带转去。
周陆氏：噢——
三姐：才勿认得格呀！
周陆氏：大娘娘，屋里住勒啥场化介？
三姐：覅去说俚，说出来也真真叫坍台。
周陆氏：哪哼啦？
三姐：来得格远，浪桐桥的了呀！
周陆氏：噢，勒桐桥的来。
三姐：自家真真作死，贪白相。近点么我就走转去则喂！
周陆氏：啊呀呀，巧哉，巧哉，巧哉！我有两个亲眷，也住勒桐桥，
三姐：哦。
周陆氏：挨些点便船带倷去吧！
三姐：覅哦。
周陆氏：啊？
三姐：白看仔龙船，白吃仔点心还要送转去是，开年五月端午，我亦是第一个先来喂！
周陆氏：喔哟——碍点啥介？便船带倷去么便格呀！
三姐：阿便介？
周陆氏：便嘎！
三姐：格么要么讲好，出两个铜钿酒钿喏！
周陆氏：哦……好格，好格。
三姐：讲好咋！
周陆氏：有数脉则喂！
三姐：勿能客气嘎！
周陆氏：晓得则喂，哦唷——
三姐：格只船呢？
周陆氏：船么，讲脱两句闲话，马上就要开该。
三姐：噢。格么我哪哼？登勒该搭等啊？
周陆氏：倷也想得出格，等勒，太阳阳色格，到伲搭去等吧，就勒对过呀，去坐脱一歇歇。倷脚么亦是勒浪痛，阿是？
三姐：到倷屋里去坐歇啊？
周陆氏：去坐歇让。
三姐：阿就要开嘎？
周陆氏：就要开关！两句闲话喂！
三姐：哦。
周陆氏：走让，搀倷一把哦。
三姐：嘬……劫生脚，烂脱俚，死人脚，断命脚，劫生脚……
周陆氏：当心！喔唷，哎束来！
三姐：嘬……
周陆氏：到哉，到哉。
三姐：就是倷屋里啊？
周陆氏：说得出格来！我屋里什梗大嘎？东家屋里！
三姐：哦，东家屋里哦。
周陆氏：咸。
三姐：格么倷呢？
周陆氏：喏，伲男格么登勒该搭做门公该。
三姐：哦，男格做门公，倷是门婆？
周陆氏：门……咸，是呀。
三姐：倷阿有小囡格介？
周陆氏：一个伲子。
三姐：倒是蚊子喂！
周陆氏：（表）还有苍蝇来！（白）里向来让！
三姐：噢。嘬……哎呀！啥两只长凳大得啦？
周陆氏：哈呀，啥格长凳介？格个叫懒凳！
三姐：触光全新勿“烂”喂！
周陆氏：哎呀，名堂叫懒凳呀！轿板笃吃力哉，等勒浪横横，懒怕些，叫懒凳。
三姐：噢。格么啥体拿链条锁牢仔，亦勿会逃走该！
周陆氏：喏！生怕么拖来拖去，弄得顶横倒竖么勿登样该！
三姐：哦，叫懒凳。
周陆氏：叫懒凳。
三姐：哦。
周陆氏：进来让！
三姐：啊，还要进去啦？
周陆氏：咸。
三姐：啊呀呀，啊呀呀。
周陆氏：啥体介？
三姐：啥恩笃家人家特别得啦！
周陆氏：哪哼啦？
三姐：哪哼台子浪戳仔桌裙勒，哎呀，靠背浪才着马甲嘎？
周陆氏：喔唷，要死快，倷哪哼才勿懂格介？台子浪叫桌围，靠背浪叫椅披！
三姐：勿是马甲啊？
周陆氏：勿对嘎！哪哼弄仔马甲出来则。
三姐：哎呀，才是绸格，洒花惯！
周陆氏：自然，伲挨搭讲究喂。
三姐：啊呀呀，别人家人也呒拨着，恩笃弄到靠背浪向去。
周陆氏：嘿嘿，伲挨搭才什梗该。进来让！
三姐：还要进去啊？
周陆氏：咸，进来让！
三姐：嘬……哎呀！该条弄堂啥黑得啦？
周陆氏：勿叫弄堂，叫备弄！
三姐：备弄啊？
周陆氏：咸。
三姐：蓦腾赤黑哪哼走呢？
周陆氏：倷等歇哦！（表）周陆氏要紧过来，墙头洞里一只只大格栏盆，里向油加足勒嗨，一大把灯草。等到点阳么，澄亮则。（白）大娘娘，
三姐：啊？
周陆氏：阿是亮则？
三姐：咸，哪亮则，亮则。（表）叫啥一看栏盆里格灯草浪铺出来，灯草一把呀！朱三姐阿要肉痛啦！想我夜里点两根也肉麻，要掐脱一根得来，一把！而且格油浪铺出来！（白）恩笃家人家真真拆烂污！
周陆氏：哪哼啦？
三姐：油勒浪铺出来，灯草一把得啦？
周陆氏：咸，伲挨搭是什梗惯。
三姐：照恩笃什梗是，一日天四两油看上去勿够惯！
周陆氏：四两来，抹布浪带脱！四斤也勿够得来！
三姐：四斤也勿够得啦？
周陆氏：自然喂。
三姐：划一，我问倷，恩笃该家人家阿有几化人介？
周陆氏：倷问上住勒下住？
三姐：上住。
周陆氏：头两个。
三姐：下住呢？
周陆氏：头伲百！
三姐：要头伲百得啦？
周陆氏：咸。
三姐：划一，我问声倷看，
周陆氏：哪哼？
三姐：恩笃该家人家阿要吃豆腐嘎？
周陆氏：（表）贼生头里问起吃豆腐起来则，（白）有时巴倒要吃吃惯！
三姐：噢，有剩时恩笃也要吃豆腐嘎？
周陆氏：也要吃吃嘎。
三姐：托倷桩事体。
周陆氏：啥体介？
三姐：假使恩笃今朝想着吃豆腐么，挑挑我格阿哥。
周陆氏：阿哥啊？倷阿哥哪哼啦？
三姐：伲阿哥开豆腐店格呀！
周陆氏：噢，开豆腐店格！
三姐：勒浪桐桥西堍廿多家门面。
周陆氏：哦——
三姐：伲阿哥叫朱小溪呀。
周陆氏：噢，叫朱小溪。
三姐：喔唷，阿哥做两块豆腐好得来！
周陆氏：阿真格介？
三姐：刷白习嫩，收口甜津津。
周陆氏：阿是？
三姐：伲阿哥做格豆腐嫩是嫩得来！
周陆氏：噢！
三姐：丢勒嘴里吃起来覅用牙齿嚼格！
周陆氏：弹格牙齿格豆腐是也朆吃着歇过！
三姐：那么恩笃倘使要吃豆腐啊，
周陆氏：哦。
三姐：买得多，还肯送格来！
周陆氏：噢，还肯送格啦？
三姐：挑挑伲阿哥。
周陆氏：蛮好，记好勒里哦。
三姐：叫朱小溪哦！
周陆氏：叫朱小溪。
三姐：覅忘记哦。
周陆氏：有数脉则喂。
三姐：提点扣头拨倷好则喂。
周陆氏：喔哟，呵呵，晓得。
三姐：勿能忘记，摆勒心浪哦！
周陆氏：晓得则喂！
三姐：（表）到底自家人，虽然今朝搭阿哥斗气，呒嘛用，生意勒浪手脚半边，俚原要照应自家阿哥。倒喊尽管往里向来，俚也弄勿懂到啥场化去啊？（白）哪，昂到则介？
周陆氏：还浪里向呀。
三姐：还要进去啦？？？
周陆氏：还要进去来！
三姐：早晓得什梗，我走转去也磨样浪哉！
周陆氏：格是到底推诿勿少喽，走让，走让！走让！！
三姐：勿……我要转去哉。
周陆氏：哎呀，倷走让！
三姐：伲男格要转来吃夜饭，我勿高兴进去哉！
周陆氏：走让！
三姐：勿……我要转去哉！
周陆氏：（表）格么周陆氏啊，倷既然拿俚骗到仔该搭么，有心好，倷拿俚骗到仔里向让！咸，叫啥俚转念头，横竖拿倷骗到仔该搭则，勿怕倷犟！搭俚讲穿好则！（白）大娘娘。
三姐：哦。
周陆氏：呵，老实讲拨倷听，便船带倷去勒，情光热昏，瞎说，骗倷！
三姐：哦，倷吃饱咋？！别人家鸡眼，脚几化痛得来，倷啥体瞎说踢出介？
周陆氏：我搭倷说，伲大娘娘要倷格人！
三姐：恩笃大娘娘要我啊？
周陆氏：咸！
三姐：喔？恩笃娘娘要我格人啊？
周陆氏：娘娘要倷格人！
三姐：喔。
周陆氏：倷阿晓得挨搭啥场化？
三姐：该搭啥人家介？
周陆氏：南濠金夹里！
三姐：出老虎惯！
周陆氏：当心点哦！！
三姐：哦……
周陆氏：伲娘娘啥人啦？
三姐：恩笃娘娘啥人啦？
周陆氏：金大娘娘！
三姐：哎呀，雌老虎喂！
周陆氏：要吃耳光哦！
三姐：噢，要我格人啊？
周陆氏：咸！
三姐：噢，要我？
周陆氏：咸，问脱两句闲话。
三姐：我认也勿认得，搭我有啥讲头介？
周陆氏：勿要紧惯，问倷两句闲话喂！就好放倷走惯！
三姐：勿，我搭俚勿认得惯！
周陆氏：勿认得么，问倷两句闲话呀，走让！
三姐：我勿去！
周陆氏：走让！
三姐：（表）金大娘娘雌老虎格名气几化大得来！俚乡下女人阿要吓格啦，金大娘娘要我，（白）我随便哪哼勿去！
周陆氏：豪稍走让！
三姐：勿去！
周陆氏：走让！！
三姐：（表）拖勒绊么，俚往地浪向一困，（白）唉，随便哪哼勿去——
周陆氏：哎呀，走让——（表）哪么要死则喂，往准里浪一困呀。周陆氏转念头，勿要紧！好得里向女厨房粗使丫头勿少勒嗨！喊个把出来帮帮忙好则，对。曳直仔喉咙勒浪喊。（白）喂，阿姐妹子笃啊，出来个把人让，娘娘要个人，格个人勿肯进去，毫稍出来帮帮忙哎！
丫头笃：（表）倷“旺”一喊么，“啪啪啪”跳出来四个粗使丫头，拳头大，臂把粗。格豪能格大膀总归比我格腰还要扎蹦！勿啥做勒，才歇歇掀掀仙人担勒格注花头。娘娘要格个人，格个人勿进去，胆能格大！（白）嫂嫂！
周陆氏：哎！
丫头笃：（表）格种才是女人哦！（白）浪啥场化介？
周陆氏：喏，格个人呀！勿肯进去呀，帮帮忙让恩笃！
丫头笃：娘娘要俚，俚勿进去？
周陆氏：是呀，我一倌仔勿来事呀！
丫头笃：要死快哉，勿受人抬举。咸，我来听倷噢！（表）听听客气得来，请。格注能格断命请，性命也请脱格。请么倷搀俚手让！脚股骨浪“搭”一把！往里向拖格呀！（白）哎呀，我来请倷！
（表）往里向拖。一边阿要吓格啦，汪朗、汪朗喊救命么弄得一塌糊涂。还好，房厅浪格金大娘娘等等格个女人勿进来么，说芳兰倷去看看，覅去吓仔俚噢。别样呒啥，等歇要问俚闲话哦。格桩事体要十多年咋，一吓要勿肯讲嘎！芳兰带两个丫头，一达路浪出来。将近到中门跟首，只听见浪喊救命呀。喊恩笃覅吓俚，现在浪喊救命则！踏出来一看么，该死！倒喊拿格女人浪地浪向拖呀！等歇俚闲话还肯讲格啦！
芳兰：姊妹们，与我放手。
丫头笃：噢，晓得，放手，格么放……
芳兰：还不与我进去。
丫头笃：噢，格么豪稍进去吧。
（表）粗使丫头要紧回进去。芳兰对周青笃家小看看，隐隐然，把扇子哪哼？周陆氏歪歪嘴，勒俚衣裳管里。芳兰一看么，看见杏黄疏头还露出勒浪。对俚眼睛霎霎，倷归倷出去。周青笃家小出去。另外两个丫头要紧拿俚搀起来，身浪向搭俚拍拍干净，什梗一来俚胆大点笃。听见大家叫俚芳姑娘。说倷笃定哦，娘娘问脱两句闲话，倷就好转格。好说好话俚放心点。叫啥一达路进来，进中门。到房厅天井里，抬起头来一看么，说金大娘娘坐勒当中，倷上去见见。朱三姐一看，金大娘娘坐勒当中。娘娘格面孔蛮标致，鹅蛋脸。倒喊倷勿能细看，越看越怕！甩眼梢，小包眼睛，前夹胸挺起，腰凛直，两只手搭勒脚馒头浪么真真象老虎什梗一只！硬硬头皮上来，心里是寒哦。俚象拜菩萨什梗。
三姐：娘娘勒上头，我……（表）俚自家呒拨称呼则呀！勿知哪哼拨俚想出来，（白）我乡下堂客，（表）自家叫自家堂客。（白）见仔娘娘哉。
金张氏：（表）当我菩萨用场？象拜什梗。（白）大娘罢了，旁侧请坐。
三姐：大娘娘勒浪上头，勿敢坐该。
丫头：叫倷坐么坐则喂，覅客气则喂，坐让。
三姐：小姐倷坐。
丫头：要死快哉，哪哼叫我小姐格介？我勒里帮人家么，哪哼叫我小姐格介？
三姐：噢，恩笃才是丫头哦！
丫头：（表）倷倒有赏有罚，要么小姐，要么丫头！（白）坐让！
三姐：格么告坐咋！（表）身体要紧坐定。
丫头：喏，吃茶喏。
三姐：（表）倒用得着，刚正“汪朗、汪朗”喊救命，喊得喉咙口干得来！倒喊朱三姐一看么，金夹里格好能格茶碗几化讲究，翠绿颜色瓜柳式老式格盖碗啦，下头有茶托勒，上头有碗盖。哪么俚看见仔阿要讨厌！“接力郭落”趁俚心浪么，顶好弄格种大格荷花碗，来格四碗冷茶，“咕嘟咕嘟”格么煞克。盖头勒，下头还有茶托么阿要讨厌。统统才去光。叫啥格只茶碗拿到手里么，格个茶实在烫勿过。要扇得冷点，吃起来么爽气点。把扇子倒亦拿出来则。俚又勿晓得别人浪看俚把扇子。（演员扇扇子）
金张氏：（表）金大娘娘一看，亦来则，亦来则，亦来则。格扇坠“嚓……”浪甩。刚正登勒水墙门楼浪看得勿大清爽，最最好现在拿把扇子拿到手里看看，到底阿是玉蜻蜓。对。（白）啊，大娘！
三姐：是。
金张氏：手中的扇儿，可能借我一观呀？
三姐：噢，娘娘要看把扇子阿是啊？
金张氏：恩。
丫头：（表）戳拨勒半边丫头么，丫头要紧拿一拿。（白）娘娘，扇子喏。
金张氏：哦。（表）金大娘娘拿扇子接到手里。
三姐：（表）叫啥格朱三姐等到扇子脱手么，俚想着！哎呀！出事体则！格把扇子俚勿能看格。桐桥堍买格呀，行货扇子，十一个铜钿！一面小楷字，翻转来格张画是景阳岗武松打老虎呀！俚格绰号雌老虎呀，覅看见仔多心介！噢，倷晓得我雌老虎，倷景阳岗武松打老虎！倷喊武松骑勒我背心浪“贼拨贼拨”，覅板面孔介！死快，哪么僵则！叫啥俚两只眼睛戳牢仔金大娘娘勒浪看，阿有啥巴望格张画覅看见哦！哪是俚茶还敢吃格啦？格只茶杯拿勒手里，眼睛急出仔，阿有啥巴望覅看见哦，覅看见哦！
金张氏：（表）金大娘娘，扇子接到手里。趁自家心浪，最最好马上就看看格扇坠到底阿是蜻蜓！就看扇坠，勿大好，覅起疑心。假痴假呆，先拿把扇子来看看。扇子曳开来一看么，噢，扇子勿灵，行货扇子。一面小楷，才是印勒浪。关面是画，景阳岗武松打老虎。娘娘看仔，不介为奇。要看扇坠咋！格只手伸下去，一看！实头玉蜻蜓！金大娘娘一个忘形骸么，（白）吓！！
三姐：（表）倷“吓”么，俚一吓呀！一脱手么，格只叉杯“啪”！哪是僵哉！断命闯起祸来倒喊连一连伲来格！只茶碗去脱，面孔急得转色！（白）大娘娘，覅动气哦！该把扇子格路倒尸斡拨勒我，我又覅买！我要买刘海洒金钱格！杀俚个千刀定规说该把好！景阳岗武松打老……
丫头：老啥？
三姐：老……
丫头：老啥？！老啥？！！
三姐：老鼠。（表）俚也只好老鼠则。（表）倷痕脱俚哦，大娘娘倷痕脱俚哦！（表）哪是茶碗也打碎则喂，让我旧货摊浪淘着仔勒赔还恩笃吧。倷痕脱俚哦，痕脱俚哦！
金张氏：（表）娘娘看啥体啊？急得什梗样式。格浪向有点啥格名堂勒嗨？重新再来看看看。娘娘曳开来一看么，噢，景阳岗武松打老虎。别人家提我雅号雌老虎勒，俚算犯仔我格讳则，急得什梗样式。娘娘转念头，现在辰光勿勒格浪，最最要紧格扇坠！金大娘娘关照丫头，拿只茶杯扫扫脱，另外再送杯茶。哪是娘娘格把扇子还肯脱手格啦！面孔也有点两样则。（白）大娘。
三姐：大娘娘。
金张氏：你柄扇儿甚好！
三姐：痕脱俚，倷覅邓让！亦勿是我要，俚斡拨我格呀！
金张氏：你这扇坠哪里来的？
三姐：阿是要问甩勒甩嘎？
金张氏：恩。
三姐：（表）归心似箭，也呒拨心路搭倷讲，瞎说仔一声么拉倒。（白）旧货摊浪买该。
金张氏：（表）啥么事啊？！金夹里传家之宝，旧货摊浪买得着嘎？倷搭我去买买看！金大娘娘面孔毕板！俚格面孔，枇杷一面孔，一面光，一面毛，一板就板。（白）大娘。
三姐：是。
金张氏：这扇坠，乃是金家祖上传留之物——汉玉蜻蜓，遗失了一十六年了，哪里来的？从实讲来，如果不然，哼哼！送官究办！
三姐：啥嘎？阿是格只甩勒甩格是恩笃格么事啊？
金张氏：是啊。
三姐：传家宝贝啊？
金张氏：恩。
三姐：（表）要死快哉！有格种能格事体嘎？竹箱里要闶十多年，倒喊是俚笃格么事？要吃官司哉！断命龙船么懊老出来看格！我晓得昨日夜里格梦勿灵啦！我原想，被头洞里哪哼会得爬出来八只蟹？当仔横财，朆晓得横祸！恶咬一口，倒喊喊俚笃格么事！（白）哦，格只甩勒甩是恩笃嘎？
丫头：咸，金夹里格么事，倷啥场化来格，说让！
三姐：大娘娘，勿瞒倷说，格样么事我要来仔十多年则，要十六年则！
金张氏：（表）娘娘一听对嘎！我小官人出去仔是要十六年，年份对格！（白）哪里来的？讲啊！
三姐：格么我从实告禀。
丫头：快点讲让！落搭来格？
三姐：讲仔么阿有啥让我早点转去吧。
丫头：晓得则喂。
三姐：伲格男格要转来吃夜饭快则。
丫头：辰光还早勒嗨来！
三姐：俚格脾气来得格难弄，夜饭烧得晚仔点，等歇亦要寻相骂勒啥。
丫头：勿要紧格，倷快点讲让！
三姐：格么讲仔要让我转嘎！
丫头：有数脉则喂。啥场化来格啦？
三姐：我么爷娘家姓朱，
丫头：姓朱。
三姐：大家才叫我三姐，排行第三。
丫头：喔。
三姐：我格男格么姓毛，吃船浪饭格。
丫头：哦。
三姐：生意么一紧勿做，一紧浪外头赌铜钿。
丫头：呒聊煞该。
三姐：阿哥么俚开豆腐店该。
丫头：哦，开豆腐店。
三姐：叫朱小溪。
丫头：喔。
三姐：哪么我嫁得近么，原叫我三姐，爷娘家格姓朆脱该。
丫头：哦。
三姐：阿是要问格只甩勒甩格啦？
丫头：咸，快点讲让！
三姐：格么讲仔让我转去哦。
丫头：有数脉则呀，喔唷，烦得啦！
三姐：唉，大娘娘，听禀哦。
（唱）一双兄妹住山塘，
（白）伲格男格俚生意勿做，我喊俚到阿哥店里去，
丫头：哦。
三姐：俚勿肯呀。
（唱）勿肯到店里向去帮忙。
一向在外家勿顾，可怜我么女工针黹度时光。
伲阿哥名叫朱小溪，俚笃夫妻并无有后嗣香。
平生爱看名班戏，
（白）叫啥俚吃、着、嫖、赌才勿欢喜，欢喜看戏。
丫头：哦，欢喜看戏。
三姐：格年仔搭么，俚笃夫妻同年四十二岁，
丫头：四十二岁。
三姐：看夜戏转，
丫头：哦！
三姐：（唱）勒浪桐桥拾得一个小儿郎。
（白）叫啥勒浪桐桥堍，看见一个男宝宝。总桐桥扜勿知啥人家小姐坏则，
丫头：哦。
三姐：来勿及送到堂里么，就什梗拆烂污甩勒桥堍半边。
丫头：哦，后来哪哼呢？
三姐：格么伲阿哥阿是呒拨小囡啦！看见格男小囡么几化欢喜！
丫头：哦。
三姐：要紧抱到屋里来么，算自家格伲子该。
丫头：哦，算自家小辈则。
三姐：小倌恩身浪向么，格只甩勒甩格，叫啥？
丫头：玉蜻蜓。
三姐：勒浪小囡身浪。
丫头：哦，勒小囡身浪。
三姐：外势还包件大人格短衫，倒是绸格。
丫头：喔！
三姐：啊呀呀，小襟浪向格字写仔行寻行事。
丫头：噢，还有字啦？
三姐：格浪还有血迹勒嗨来。
丫头：喔！
三姐：哪么啥格字么伲才勿识格呀！
丫头：哦。
三姐：想意思么总是小倌恩格年庚八字。
丫头：咸……
三姐：勿是自家养么，伲阿嫂呒拨奶奶格呀。
丫头：对惯！
三姐：哪么吃哪哼弄法呢？
丫头：哦！
三姐：哪么格辰光我齐巧坏脱个女小娘恩，叫毛头，不过撒四日天，奶奶朆上棚来。
丫头：喔。
三姐：阿哥来喊我则呀。
丫头：哦，来喊倷则。
三姐：（唱）半夜三更喊我去，我么幸趋奶奶勿曾棚。
（白）叫我去饮奶该！
丫头：哦，叫倷去饮奶格。
三姐：哪么阿哥拿格件大人格短衫，还有格只甩勒甩格……
丫头：玉蜻蜓！哎呀，青肚皮啊倷啊！
三姐：一紧要忘记！格两样么事送拨勒我，算开奶钿。
丫头：喔。
三姐：一紧笃勒竹箱里呀，哪么今朝我出来看龙船么，看见别人家扇子下头才有甩勒甩么，我想着格只么事，我去绕勒扇子浪。
丫头：哦。
三姐：倒喊是恩笃该！
丫头：噢……
三姐：恩笃格么只好还恩笃喂！格么格只茶碗么勿客气哉，大家。
金张氏：（表）金大娘娘一听啥？格只玉蜻蜓勒浪小倌身浪，小倌身浪还有件大人短衫，上头还有勿少字。覅说得喂，格只玉蜻蜓勒浪小倌身浪，格小倌板是男人养勒外头格亲骨血。倒弄勿懂，既然格个小倌男人养勒外头，啥体勿送到屋里来，摆勒桐桥堍呢？娘娘转念头还勿要紧，就算男人不测么，还有小辈。格么看上去格个小倌总勒豆腐店里啊！格么我家当搭俚笃一人一半，小倌我要抱转来。问问看。（白）大娘。
三姐：是。
金张氏：如今这小孩童竟在何处？
三姐：啊呀呀，恩笃家人家哪哼脚脚搛格介？
丫头：哪哼啦？
三姐：问仔甩勒甩么问小囡，什梗讲到天亮也讲勿完惯！
丫头：哎呀！辰光早勒嗨呀，倷说让，小倌呢？
三姐：恩笃么早，伲格男格要转来吃夜饭，吃勿着夜饭要打格呀！
丫头：喔哟，勿碍格勒呀，讲让！小倌呢？
三姐：随便哪哼勿讲，我要转去哉！
丫头：我关照倷，倷识相点哦！勿讲勿让倷走嘎！
三姐：板要讲嘎？
丫头：快点讲！
三姐：格么小囡讲完仔要让我转嘎！
丫头：晓得则喂。
三姐：阿有啥覅想出花头咋！
丫头：快点讲，小倌呢？
三姐：小倌恩么，阿哥抱仔转来当自家伲子么，倷想俚笃四十二岁呒拨小囡，格个小囡阿要欢喜格啦？
丫头：咸……
三姐：一日到夜得牢仔，做生意也呒拨心路哉。
丫头：噢。
三姐：（唱）从此作事多颠倒，
（白）叫啥格日仔搭，
丫头：恩。
三姐：（唱）两间一批房子着得精当光。
（白）格日仔搭，伲阿嫂烧烧饭，一个勿当心，
丫头：哦。
三姐：“哄、啡”，一蓬烟，房子呒拨格则呀！
丫头：啥勒“哄、啡”，一蓬烟，房子呢？
三姐：烧饭倷阿懂啦？
丫头：懂惯！
三姐：“哄、啡”，一蓬烟，房子呒拨则呀！
丫头：啥勒：“哄、啡”，一蓬烟，房子么呒拨，房子哪哼会呒拨呢？
三姐：倷烧饭阿懂啦？
丫头：烧饭懂惯！
三姐：（作摩擦火刀火石动作）“哄、啡”，一蓬烟——
丫头：哦——戳怕火着脱格哉！
三姐：咸——格个字只好恩笃说，我勿敢说格！（表）俚倒喊为仔金大娘娘雌老虎勒，吓得火着格火也勿敢说！生怕犯讳！一蓬烟，房子呒拨则喂！
丫头：噢，火着脱格哉。格么后来哪哼呢？
三姐：后来是也覅去说俚，
（唱）伲阿哥发痴么呒收捉，姑嫂度日汰衣裳。
（白）日脚实在难过，过勿落哉！
丫头：哪哼？
三姐：格日仔搭倒巧则呀，
丫头：哪哼巧？
三姐：门口走过个人，
丫头：喔？
三姐：（唱）来仔山东姓徐茧绸客，将儿买去作后嗣香。
（白）山东茧绸客人姓徐，倒喊欢喜格小囡，
丫头：咸！
三姐：讲好拿小囡摆勒篮里向称，小倌恩几化重，拿银子称还伲几化，
丫头：哦！
三姐：小倌九斤六两，一百五十两银子，卖脱该。
丫头：噢，卖脱格咋？
三姐：咸——
（唱）屈指到今十六载，一去如今是信渺茫。
勿是偷来勿是盗，我么直心直肺直肚肠，
快点放我转山塘。
（白）讲完则喂，哪好让我转则喂！
金张氏：哦，噢~~~~（白）金大娘娘听完么，哎呀，哪么完结。我总当仔格个小倌勒豆腐店里，叫啥现在格个小倌已经卖脱哉！卖拨勒一个走过人，山东人姓徐，做茧绸生意格。山东场化几化大，姓徐格人几几化化，叫我啥场化去寻呢？娘娘实在坐勿牢，要哭出来则！立起身来，拿仔把扇子，往准里向“得……”
（表）倷往里向去么，芳兰有数脉，晓得娘娘去哭则。要劝劝哦！交代朱三姐倷坐坐哦，伲就来嘎。叫啥带仔丫头、阿妈、娘姨统统才往里向去，外头就剩俚一倌仔。哪三姐还敢走格啦？倘使一走，背后头追上来，伲勿见脱把茶壶！争也争勿明白！啥金夹里格人什梗腔调，哪也只能等则。叫啥金大娘娘一到房间里向，号啕大哭，哪是男人勿着杠，伲子也呒拨格则。哪么格家人家哪哼弄法呢？芳兰登勒半边要紧劝俚，旁观者清。说娘娘，倷阿听见格个女人说，小囡身浪，外头还包一件大人格短衫，绸格，格浪还有许多字。喊格个女人短衫拿得来，伲来看看看，作兴一看就好明白。大爷到底勒啥场化，是凶是吉，格个小囡哪哼道理。倷一哭倷完结则喂！格么娘娘说我才托仔倷吧。芳兰说什梗，格把扇子勿见得再还格个女人，不过倷娘娘也要拨一把扇子拨俚，搭俚对调，勿然难听相格，吃光别人家扇子，要出凶名声格。喊俚拿件短衫来么，倷娘娘总也要拨件衣裳拨俚，算搭俚对调格。说刚刚格个女人我看俚跌交跟斗，拨俚讲出去勿大好，拨十两银子拨俚。哎呀，娘娘说倷覅搭我来缠则，倷拨俚金子好则，勿关我事！我等倷回音！哪么芳兰马上开箱子么，要紧拿金大娘娘格扇子。金大娘娘格扇子才是好货。再去开箱子，拿件衣裳么，瞎猫拖死老虫，拿格包裹打开么，也朆看一看，玄色细纱格披风。哪么倷喊俚着仔么哪哼弄法呢？另外再拿十两银子么，带丫头、阿妈、娘姨出来。朱三姐一看，总算来则。
朱三姐：哦，恩笃来咋？
丫头：哦哟，等仔半日则阿是？
朱三姐：哦。
丫头：对勿住哦！
朱三姐：覅客气。
丫头：喏……格把扇子喏！
朱三姐：作啥介？
丫头：喏！倷把扇子伲娘娘要哉！搭倷调一把。
朱三姐：该把搭我调啊？
丫头：咸。看看看，落把好介？
朱三姐：自然格把好喂！
丫头：噢，倷倒识货该。
朱三姐：哪哼勿识货介。
丫头：大骨呢？
朱三姐：象牙惯。
丫头：小骨介？
朱三姐：檀香惯。
丫头：倷倒懂该。销钉呢？
朱三姐：紫铜惯。
丫头：金该！
朱三姐：金嘎？
丫头：自然。
朱三姐：拆烂污，恩笃金格弄到格浪向去啊？
丫头：格么就叫金夹里喂！
朱三姐：真真，哦……
丫头：扇坠啥么事介？
朱三姐：扇坠啊？
丫头：咸。
朱三姐：（表）倒俚齐巧识货格呀，琥珀格双桃！俚笃屋里贴隔壁啦，有爿刻图章店，好老格琥珀，批轻呒拨分量该！（白）懂惯！
丫头：啥么事介？
朱三姐：珀惯！！
丫头：要死快，拨倷一吓得来！啥么事喔？
朱三姐：珀惯！！
丫头：琥珀该！
朱三姐：咸，格个字只要恩笃说，我总归勿敢说该，勿敢说该。
丫头：喏，还有件衣裳勒里来！
朱三姐：作啥介？
丫头：喏，刚正倷阿是说格啦？小倌身浪向还有件大人短衫。
朱三姐：绸惯。
丫头：咸，哪么倷娘娘想拿转来看看看。
朱三姐：噢？
丫头：所以搭倷调一件。喏，该件喏，拨倷喏！
朱三姐：恩笃要，我拿得来好则啊！
丫头：覅喂！倒说拿倷衣裳！搭倷调一件哦！
朱三姐：格是真真也好煞则。
丫头：覅客气喂。
朱三姐：哦。
丫头：该搭还有十两银子。
朱三姐：啥体介？
丫头：娘娘说该，赔罪压惊该！
朱三姐：啥叫赔罪压惊？
丫头：（表）要死快，才勿懂格喏！覅搭俚多花头，（白）喏！为仔倷刚正跌仔交跟斗了，拨倷十两银子。
朱三姐：哪哼勒跌跟斗勒有银子格介？
丫头：喏，金夹里规矩！
朱三姐：哦，金夹里有什梗格规矩嘎？
丫头：咸！
朱三姐：哦，跌仔跟斗有十两银子嘎？
丫头：咸！
朱三姐：格么……等歇出去跌跟斗阿有格介？
丫头：哪是呒拨格咋！
朱三姐：哪呒拨格咋？
丫头：咸！
朱三姐：格么，格么我去则哦，短衫我送得来好则。
丫头：倷，倷，覅则喂！伲差个阿哥兄弟跟倷去拿好则。
朱三姐：哦，跟我去阿是？
丫头：咸。倷勿能汰嘎！勿能汰嘎！伲要字哦！
朱三姐：哦，勿汰阿是？
丫头：咸。
朱三姐：龌龊煞格让！
丫头：覅要紧惯！伲就要龌龊喂！
（表）芳兰马上关照看后门格金兴，顶能干则。搭金兴咬耳朵，说倷跟格个女人转去，送俚转去。还有件短衫去拿得来。千定千定噢！格个女人覅开箱子拿出来一看，百疙烂皱，格浪霉点行寻行市，觉得难为情，拿挡勿出去撮一把，覅拨俚撮哦！一撮金夹里家人家才要撮光嘎！尽龌龊、尽邋遢拿来！倷拿仔短衫，近段再去打听打听看，阿有介事，桐桥西堍有爿豆腐店，老板叫朱小溪，什梗长、什梗短。倷打听打听， 而且门堂子认认清爽。娘娘下来要格个人么，要倷去喊该。金兴有数脉则，倒喊拿朱三姐送到屋里向么，朱三姐去开箱子则。十六年则呀！格件短衫亦勿着格，翻勒翻，翻到箱子底下，拿出来一看么，定规百疙烂皱呀！格浪霉点行寻行市，俚倒勿客气让！拿仔只面盆倒要想去撮脱一把。
朱三姐：倷坐歇哦！
金兴：倷落搭去啊？
朱三姐：撮脱一把哦。
金兴：哦！对勿住！对勿住！！嚯哟，勿能撮嘎！（表）金夹里家人家拨倷撮光。（白）来……
朱三姐：哎呀，邋遢得来！
金兴：勿要紧惯！伲就要格点龌龊！咸——越邋遢越好！来让！
朱三姐：格么真真难为情煞！
金兴：勿要紧惯！
朱三姐：格么倷坐歇，我去喊碗馄饨来。
金兴：覅客气，覅客气！过日来，过日来。
朱三姐：哪么倷走好哦！
金兴：哦呀，过日会哦！
朱三姐：走好哦！
金兴：（表）踏出来，要认认场化哦！下来作兴要来看格！一看倒蛮好认该，门口两棵大树，树浪向两个绳圈圈，搭别人家汰衣裳，挂竹头用该。记好。芳兰关照我嘎，还要去打听一个朱小溪啦，勒桐桥堍。金兴一达路过来，到桐桥堍一看么，一开间一爿豆腐店。只看见里向一男一女两家头对脚背吃夜饭。男人勿知阿是叫朱小溪喂，最好问个信。不过问信年纪轻格人勿大晓得，年数长远，要十六年则呀！一看么，巧则！豆腐店斜角对过门前头坐个老太，金兴踏过来一看，格老太哪哼道理？五月里天气浪烘脚炉喏！一看两横头呒拨人么，掩勒掩过来。（白）好婆啊！呵呵。
老太：（表）格老太，烘脚炉。脚炉里向勿是炭墼，鸡倒也是鸡，俚养四只小鸡，张怕拨勒走过人踏煞么，俚养勒脚炉里，而且勿会闷煞格。年纪大则，眼瞎拉搭，也勿晓得啥人。（白）啥人啊？
金兴：好婆啊！阿我格声音也听勿出咋？
老太：（表）老太格脾气蛮飚格，哪俚板要听出来则。（白）双喜倌。
金兴：咸——好婆倷格耳朵实头灵格，赛过眼睛喏，双……喜呀！
老太：倷几时转来嘎？
金兴：（表）金兴转念头，我一紧勒里苏州喂！和声调。（白）昨日！昨日。
老太：作怕恩笃娘写信喊倷转格。
金兴：咸，姆妹喊我转格呀！
老太：格么哪哼我格伲子倒朆转？
金兴：（表）金兴想，我哪哼晓得呢？倷格伲子我哪哼晓得呢？和调么拉倒。（白）咸，是呀，我先转，俚慢转哦！
老太：作怕还有两只台脚勒阿是？
金兴：两……（表）绝！金兴人几化聪明！懂则喂，两只台脚么还有两只码头，伲子唱戏该，哪是灵！（白）咸，对格！还有两只码头，唱仔就要转格！
老太：该腔我伲子格喉咙哪哼？
金兴：好——嚯哟，格只喉咙是真真刮朗朗，越唱越好！一出《刀会》，一出《训子》，真真唱绝格哉！好！实头好！刮朗朗！
老太：倷阿是双喜倌？
金兴：双……双喜喂。
老太：勿对拉里则喂！
金兴：哪哼啦？
老太：我格伲子唱小旦格么，哪哼唱起大面来则呢？
金兴：哦……（表）要死快哉，太活络哉！（白）好婆啊！
老太：啊？
金兴：倷格伲子唱小旦么，我哪哼勿晓得呢！近来呒清头，好婆啊！转来仔说么覅去说俚哦！
老太：噢！
金兴：呒清头，夜里向么磨夜作，吃酒，格只喉咙去脱。
老太：啊呀呀。
金兴：哪么改唱大面。
老太：哦。
金兴：咦！叫啥注得俚吃格碗饭呀！唱仔大面倒喊来得格灵呀！
老太：哈……
金兴：来得格灵！嘿嘿。覅去说俚哦！
老太：改唱大面则？
金兴：是呀！（表）金兴转念头，我要问问俚哉，在让俚问下去，我要拨俚逼煞哉！（白）好婆啊！
老太：啊？
金兴：我问声倷看，斜角对过豆腐店里，一男一女勒吃夜饭，格个男人啊，阿是叫朱小溪啊？
老太：蛮准。
金兴：是嘎？
老太：噢，倷提起格杀千刀我就胃气痛。
金兴：哪哼啦？
老太：格路倒尸过歇象煞有介事，穷格辰光才忘记。
金兴：哦。
老太：今朝俚烧南瓜，家家人家才派一碗，就剩该正我搭呒拨！
金兴：噢！
老太：俚晓得我顶欢喜！杀俚个千刀，是俚，是俚，是俚。
金兴：哦，是叫朱小溪。格么好婆啊，阿有介事十六年前，俚看夜戏回转来，桐桥堍拾着格伲子，阿有介事啊？
老太：倷哪哼晓得格？
金兴：好婆倷倒猜猜看喏，我哪哼晓得格喏——
老太：覅猜得惯！
金兴：哪哼？
老太：恩笃娘讲拨倷听格。
金兴：咸！是呀，姆妹讲拨我听格呀！勿然我哪哼晓得呢！
老太：倷阿晓得恩笃娘哪哼晓得格？
金兴：姆妹哪哼晓得啦？
老太：我讲拨恩笃娘听格。
金兴：便介啦！！阿是好婆讲嘎！勿然姆妈哪哼会晓得呢。
老太：有介事格。
金兴：噢，有介事嘎？
老太：恩，小囡抱到屋里向，横浪横浪，喊老娘，假装肚里痛，当别人死人。
金兴：哦！
老太：关伲啥体！有介事格。
金兴：哦，有介事该！（咕白）对格，朆瞎说。（白）哦，格么阿有介事，后来小倌进仔门么，一家人家弄得七颠八倒，豆腐店么烧脱勒，朱小溪么发痴勒，阿有介事啦？
老太：倷哪哼晓得格？
金兴：好婆倷倒猜猜看喏，我哪哼晓得格喏——
老太：总恩笃娘讲惯！
金兴：咸，是呀，姆妈讲格呀！
老太：倷阿晓得恩笃娘哪哼晓得格？
金兴：姆妈哪哼晓得格？
老太：我搭恩笃娘讲格。
金兴：噢！亦是倷好婆说嘎！对则，对则！
老太：有介事该，喔唷，发仔痴，横浪横浪喊，银子烧氧哉，银子烧氧哉。
金兴：哦！
老太：有介事格，有介事格。
金兴：哦，有介事该！（咕白）倒亦对格。（白）哦，有介事格。格么阿有介事后搜来格日脚实在过勿落勒，拿格小倌卖脱格。卖拨勒一个走过人，山东人，姓徐，做茧绸生意格。讲好，拿格小倌摆勒羹篮里称，一百五十两银子！好婆啊，阿有介事啊？
老太：倷哪哼晓得格？
金兴：我么伲姆妹讲惯！
老太：恩笃娘哪哼晓得格？
金兴：姆妹么，总亦是倷好婆说惯！
老太：勿对拉里！
金兴：哪哼啦？
老太：倷阿是双喜倌？
金兴：双喜喂！
老太：小囡摆勒篮里称，九斤六两重，一百五十两银子，我也勿晓得么，恩笃娘哪哼晓得格呢？
金兴：格个……（表）哪么要死哉！俚也勿晓得，哪哼晓得格呢？格么金兴啊，倷闲话问着要走么，倷回头声俚让！俚转念头，横竖我要问格才问着则喂，快点走吧！叫啥别转身来，往准关面，“哈达……”
老太：双喜倌啊，我也勿晓得么，恩笃娘哪哼晓得格呢？双喜倌啊……双喜啊！！！！（表）老太阿要吓格啦！呒拨声音则呀！一想么，勿是双喜倌！掩门贼！晓得我昨日摇着一脚会，三十千铜钿，现在先来看看脚地，今朝夜里要动手则！我原说我伲子哪哼唱起大面来则，是勿对则喂！
（表）老太马上关照里向媳妇，说今朝夜里向大家覅困哦，防防，看上去贼要来偷则！害格老太一夜天朆困呀，才是金兴害人呀！汗衫拿转去，哪么娘娘关照元宰详诗，看龙船告一段落。
（表）金张氏，一带勿带，今年已经三十二岁。为仔男人金贵升出去仔勿转勒，屋里向实在昏闷。叫啥今朝五月端午，娘娘就勒浪水墙门楼浪向要看龙船则。倷想格水墙门共总八间勒，上头八间，下头八间，十六间只有俚一官仔看龙船。半边阿妈娘姨有是有格，才是陪客，正主只有俚一官仔。朆晓得等到吃过饭，南濠街浪向格人啊，热昏么好则。搭格潮水什梗勒涌得来，“嚯落……”顶顶作孽么格两个女人则，轧得来，好么自家也勿好，格么格种轧头里么倷就安逸点则呀，搀仔阿大，抱仔阿二，背心浪还要驼个阿三。哪么有种男人么也勿好，蛮空格场化倒喊勿走，叫得格面有个女人，格外轧点笃。格个名堂叫做轧，做得像煞轧。年纪大点格老太滚勒地浪，搀也呒拨人搀。哪么有两个女人抬起头来看见金大娘娘水墙门楼么，阿要说格啦，哪哼俚笃能格惬意？大家是一家人家格当家人，俚笃不过该两个铜钿，伲能格轧呢？金大娘娘听见则。格听勒浪到底倷格龙船也看勿落。娘娘想横竖下头八间头空勒浪，马上关照男底下人，拿沿河格长窗蜕脱，摆好长凳，台子浪向么粽子、馒头、还有四茶缸茶。关照是女才好进来，男人勿许进来，啥体？要来搅枪头该！要弄勿清爽格。叫啥等到下头统统才摆好舒齐，金大娘娘对下头一看么，一个人也呒拨人进去。格种女人走过仔，对里向望望么才勿敢进去。啥体么？格个排场摆煞格，台浪向粽子勒，馒头勒，当仔卖铜钿勒，当仔赶节场勒！哪么娘娘关照丫头，说去交代看门周青笃家小周陆氏，去揽揽生意看。叫头难头难，第一个有人进来，后头就有人跟进来则。
丫鬟：（表）丫头要紧到下头，（白）嫂嫂啊！
周陆氏：哎呀，妹子啊！
丫鬟：娘娘关照倷揽揽生意看！
周陆氏：揽揽生意啊？
丫鬟：女格才好进来，男格勿许进来哦！
周陆氏：为啥介？
丫鬟：啊呀呀，金睛鱼缸里弄条黑鱼精么要弄勿清爽则呀！
周陆氏：哦，有数脉则喂！
丫鬟：揽揽生意看哦！
周陆氏：哦，晓得。（表）周陆氏也响勿落呀，叫啥覅铜钿还要揽生意来。等仔半日么实头一个也呒拨进来呀。一看么，关面过来个老太。覅去管俚，头难头难，试试看，叫得一个进来，才会得跟进来格。周陆氏过来么，（白）喂，好婆啊！
老太：哎呀，格位大娘娘。
周陆氏：哎，是呀，好婆啊，倷作啥介？
老太：哈呀，看龙船喂，作啥介。
周陆氏：噢。
老太：轧得来！
周陆氏：是呀。
老太：什梗一把年纪，懊牢出来格。
周陆氏：哪哼啦？
老太：今朝也勿知哪哼起劲呀，隔忙头里。
周陆氏：恩。
老太：要想回转去么，人只有勒浪过来。
周陆氏：是呀，轧得什梗样式，倷哪哼轧得过俚笃呢？
老太：是呀。
周陆氏：好婆啊！倷来让！
老太：啊？
周陆氏：到里向去看让！里向么轧也呒拨人轧倷，看起来么来得格清爽！肚皮饿么有粽子吃，口干么还有茶吃，进去让！
老太：哦，倷是开店娘娘。
周陆氏：勿开啥店喂！
老太：开格看龙船店。
周陆氏：哎呀，勿对嘎！伲娘娘行方便呀！覅铜钿格呀！好婆倷进来让！
老太：真嘎？
周陆氏：咸！
老太：覅遛哦！
周陆氏：哪哼啦？
老太：绢头包里统光带十四个铜钿，覅吃仔点心要算帐是要弄僵嘎！
周陆氏：喔唷，好婆倷放心让！一骨钿也覅倷格呀！
老太：噢！
周陆氏：咸！女人么才好进来格，男人么一个也勿许进来格！
老太：噢，是女才好进来格？
周陆氏：咸，进来哦！
老太：哈哈……有数脉则，有数脉则！哎呀，恩笃来啊！（表）好婆一招手，嚯哟！今朝俚跟脚浪向出来人要撒四十得来！才是女！二阿姨、三婶婶、四妹妹、六阿姐、七好婆，“嚯落……”统统才进去。叫啥真真一歇歇工夫啦，下头格个八间头，轧得实实质质。轧得哪哼？轧得筷伍塞勿落一只么我想形容则！格么人格个气总也要断快则。轧得来大膀插勿落一只么倒作兴格！真真一歇歇工夫么，台浪向粽子、馒头才搭光则，四只茶缸里已经空则。坐勒浪，长窗等到蜕脱么，看龙船来得格好！叫啥我交代格班女人进去啦，有一个人今朝亦在其中，也进去。啥人么？豆腐店里老板朱小溪格妹子，叫朱三姐，今朝亦在其中。格辰光三师太养格小囡，交待老佛婆送到金夹里，拨勒豆腐店里老板拾得去。后来吃奶奶就是吃俚格。倷想日脚阿要快？倒喊俚已经五十开外则。今朝格朱三姐替阿哥斗气，阿哥阿嫂看龙船朆喊声俚，年纪大仔啊，有剩时会得寻点气出来格。格倷喊声我么则喂，我也出两个铜钿好则，喊才勿喊，倷阿哥格辰光发痴格当口穷得来，我汰仔衣裳养恩笃一家门倷哪哼忘记咋？今朝斗气，一官仔也要去看龙船。倒喊俚一官仔看龙船。身浪向换套新衣裳么，勒浪桐桥堍买把新格扇子。十一个铜钿买把行货扇子。俚看见别人家扇子下头才有只甩勒甩格扇坠格，叫啥格朱三姐想着，划一我竹箱里也有一只勒嗨。一只石膏格蜻蜓。其实是玉蜻蜓，价值连城，俚勿识货，当俚石膏格。倘使俚晓得值铜钿，老早去变卖脱则。牛结牯结去结上去。身边么藏格几十个铜钿，甜格咸格买点吃。倒喊俚今朝出来白相，脚浪向去着双新鞋子么上当。格双鞋子小什梗一滴滴，格老皮匠格楦头朆楦足格。格拔上去格辰光硬紧拔格，到街浪一走，格个脚一热，脚涨则，而且俚有鸡眼格！噢，格个断命鸡眼难行相格。脚痛则！现在么亦在其中，到仔八间头当中去则。格脚痛倷坐定仔看龙船蛮好。叫啥真真一歇歇工夫龙船来则，“仓咚……”到金大娘娘水墙门，十五只龙船要上来朝贺娘娘。金大娘娘么放点赏，打打招，兜脱两个圈子么龙船倒喊出城，到胥门外势，胥江渡口去则。今朝还有夜色，河里向格点闲船才跟出去。金大娘娘倒喊趴勒窗口对下头八间头一看啦，格个八间头里格女人才浪散出去则，“嚯落……”来格辰光零零碎碎，现在去格辰光等当去，想勿到八间头好坐什梗性人。勿晓得金夹里男底下人哦，等到格班女格散脱以后么，俪预备也要到胥门外势去看夜色则，所以拼命勒浪收长凳。一看么，倒喊还挺一个女人。坐勒浪尽管勿走。啥人么，朱三姐。啥体勿走么，脚痛。格个脚痛倷熬仔有心走啦，不过什梗。脚痛顶顶勿好么，倷坐歇，接接力，哪倷还要想踏到地浪，格个痛叫阴心肝痛！倷坐勒浪么，格个底下人登了半边等倷只凳子呀！嘴里蛮客气格：“慢慢叫好则，慢慢叫好则。”格吃粥饭格人才懂，慢慢叫就是喊我快点。“我让倷哦！”“慢慢叫好则！”“我让倷！”“慢慢叫好则！”硬硬头皮，格只脚刚刚立到地浪，屁股齐巧离开凳子么，俚格只长凳“啪”已经抽脱格则！肩胛浪也到则。“慢慢叫好则！”人也去格则。朱三姐等到出水墙门，一看此地沿河有棵树，杨柳树。身体勒浪树浪向戤一戤，脚实在痛勿过则。叫啥俚格只脚圈起来则。起格只手，拿自家脚指头一把去捏牢，而且拼命格斟紧！啥体？倷捏紧仔，格个血脉勿和啦，让俚格痛好勿觉着，好木瑟瑟。勿晓得身浪向一有痛苦么，人觉着热劳劳则。衣裳管里格把扇子拿出来，要扇扇。眼睛呢，对河里向勒浪看，因为俚格男人吃船浪饭格，阿有男人格朋友便船过么，托俚笃带带。出点酒钿，今朝走转去行勿落则。勒浪扇（演员扇扇子）。勿晓得倷扇子勒浪扇，“姹……”下头格扇坠，格只蜻蜓“姹……”太阳光射勒浪么，光华闪烁！扇扇停停，停停么倒亦勒浪扇。
金张氏：（表）金大娘娘趴勒浪水墙门楼浪么勒浪看野眼。一看么，陆陆续续，才浪出去。走得差勿多咋！偶尔对该面一看么，哎呀！哪哼格个女人只有一只脚介？独脚大仙啊？一只脚哪哼立得直格介？噢！再一看么，一只脚圈起勒浪。戤勒浪后头树浪向。只看见女人手里向拿把扇子，格个扇坠，太阳光照勒浪光华闪烁！看上去格个扇坠值两骨钿。勿知啥么事，看看看。要想看，看勿清爽。因为俚扇急急勒浪。扇急急么，格个扇坠也甩急急。咸！等仔一歇歇，只看见把扇子复勒胸口头，格个扇坠荡勒浪，哪倒好看一看则。格要想看么，“姹……”亦勒浪扇则。咸，再等仔歇倒亦停仔下来则。哪好看咋！金大娘娘打足精神，对扇坠一看，（白）啊！（表）玉蜻蜓喂！金夹里传家之宝玉蜻蜓哪哼会得勒格女人手里？娘娘再一想，勿对。因为我一紧浪牵记小官人，阿会心悸仔勒，眼花看错？关照芳兰也来看看看。（白）啊，芳兰。
芳兰：娘娘。
金张氏：你看这妇人，手中的扇坠，什么东西？
芳兰：（表）哎呀，娘娘哪哼勒看别人家扇坠啊？倒要看看看。叫啥趴到窗畔浪对下头一看么，格水墙门楼勿高几化格，望下去碧波生清！玉蜻蜓喂！而且看见下头一蓬杏黄苏头，年数多勿过，颜色变脱格则。大爷带出去，哪哼勒了格个女人手里？（白）娘娘。
金张氏：恩。
芳兰：这是我们金家传家之宝——玉蜻蜓呀！
金张氏：噢，果然蜻蜓！
芳兰：是啊！
金张氏：（表）哪完则，实头玉蜻蜓！勿会得两个人才看错。玉蜻蜓金家传家之宝，十六年前小官人带出去格。什梗格宝贝小官人脱到手是，看上去凶多吉少。哪僵则！金夹里一家人家统统才勒我身浪，喊我哪哼弄法？叫啥金大娘娘调调小脚么，号啕痛哭。（白）噢呀！官人啦！
（唱）一见蜻蜓双足调，忆夫君血泪涌如潮。
无差是奴官人物，缘何今朝独自竟转南濠。
（表）照份理小官人回转来，带仔格只蜻蜓一淘转。倒喊现在蜻蜓勒女人手里，男人不知去向。看上去覅我格男人搭格个女人有啥往来介？（白）啊，芳兰。
芳兰：娘娘。
金张氏：（唱）这传家之宝在这妇人手，与你东人好相交。
（白）芳兰，你道可是哦？
芳兰：（表）芳兰一听，对娘娘看看，哪哼拨倷说出来格！恩笃大爷传家之宝会得拨勒格个女人勒，说看上去搭格个女人板有道理格。勿然格种么事哪哼会得脱手勒浪俚手里？芳兰对娘娘看看，倷看看格个女人看，几化年纪？五十开外则呀。就讲十六年前看俚姿色也平常。呒拨格种事体格！伲大爷阿会什梗？格么哪哼玉蜻蜓勒浪俚手里呢？芳兰想，我看啊，一定另外有一个女人，绝色佳人，才貌双全。搭格个女人认得格。伲大爷么当中横里板托俚格。（白）娘娘。
金张氏：芳兰。
芳兰：（唱）我想附近必有如花女，她是穿引金针线一条。
我们大爷是酬谢妇人这情一点，
（表）当中横里就托格个女人成功格。哪么总要拨点谢意拨俚么，就叫大爷，老虎脾气，出去朆带铜钿，喏！玉蜻蜓拨仔倷吧！所以勒浪俚手里。我看板是什梗格。
（唱）把那玉蜻蜓相谢作酬劳。
主母啊，我劝你么休悲苦，莫心焦，今朝见根能知叶和苗。
（表）伲赛过十六年前放脱一只鹞子，今朝呢，无意当中看见根鹞线则。覅哭！叫得拿根线受好俚，“得儿”一受，就好晓得格顶鹞子到底勒啥场化。伲大爷出去仔不知行踪，蜻蜓俚带出去。现在蜻蜓勒俚手里，伲就好问格个女人，倷落搭来格？大爷到底是凶是吉？格个女人到底勒啥场化，一问就晓得，倷哭就啥格用场呢？（白）娘娘，你看如何？
金张氏：这个么！（表）咸，娘娘转念头对嘎！既然现在有仔线索么应当追下去。不过现在我娘娘心里向碌碌乱，想勿出别格办法。（白）芳兰，我娘娘方寸已乱，你去与我办吧。
芳兰：遵娘娘吩咐！（表）金大娘娘心里向碌碌乱，交托拨勒芳兰，格么倷去搭我办。叫啥芳兰马上关照丫头到下头去拿周青笃家小周陆氏喊上来。指拨勒周青家小看，（白）你看，这个妇人。
周陆氏：噢，一个女人哪哼介？
芳兰：（表）头要紧覅弄错人哦，喏，戤勒树浪向，一只脚圈起格，独脚大仙什梗一个。娘娘要俚格人。覅去吓俚哦！要软骗，说鬼话，拿俚骗到对过房厅浪。娘娘有闲话要盘问俚。覅吓俚哦，一吓俚俚要勿敢讲格。千定千定勿能够吓俚。勿能放俚走啊！金夹里一家人家才勒俚身浪！（白）你可明白否？
周陆氏：嗷，有数脉则喂！
（表）说完么，芳兰替娘娘要紧下楼，两肩晚轿到对过么，丫头阿妈娘姨统统跟过去。坐到房厅浪么勒浪等格个女人。
周陆氏：（表）周陆氏也弄勿懂呀，哪哼道理娘娘看看龙船么，要起个女人来则。而且金夹里一家人家才勒格女人身浪，格倒推诿勿起哦！要拿俚骗过来哦！想好一番闲话走过来，走到俚身半边。（白）啊呀呀，大娘娘。
三姐：一看认得格，就是请我吃粽子勒馒头勒。（白）啊呀，开店娘娘！
周陆氏：喔唷，我勿开啥店喂！
三姐：阿是开看龙船店啦？
周陆氏：勿对嘎！娘娘行方便呀！
三姐：哦。
周陆氏：大娘娘，倷浪作啥介？
三姐：脚痛！
周陆氏：哦。
三姐：断命鸡眼！
周陆氏：啊呀呀。
三姐：那么我浪看河里向阿有便船过么，托俚笃带转去。
周陆氏：噢——
三姐：才勿认得格呀！
周陆氏：大娘娘，屋里住勒啥场化介？
三姐：覅去说俚，说出来也真真叫坍台。
周陆氏：哪哼啦？
三姐：来得格远，浪桐桥的了呀！
周陆氏：噢，勒桐桥的来。
三姐：自家真真作死，贪白相。近点么我就走转去则喂！
周陆氏：啊呀呀，巧哉，巧哉，巧哉！我有两个亲眷，也住勒桐桥，
三姐：哦。
周陆氏：挨些点便船带倷去吧！
三姐：覅哦。
周陆氏：啊？
三姐：白看仔龙船，白吃仔点心还要送转去是，开年五月端午，我亦是第一个先来喂！
周陆氏：喔哟——碍点啥介？便船带倷去么便格呀！
三姐：阿便介？
周陆氏：便嘎！
三姐：格么要么讲好，出两个铜钿酒钿喏！
周陆氏：哦……好格，好格。
三姐：讲好咋！
周陆氏：有数脉则喂！
三姐：勿能客气嘎！
周陆氏：晓得则喂，哦唷——
三姐：格只船呢？
周陆氏：船么，讲脱两句闲话，马上就要开该。
三姐：噢。格么我哪哼？登勒该搭等啊？
周陆氏：倷也想得出格，等勒，太阳阳色格，到伲搭去等吧，就勒对过呀，去坐脱一歇歇。倷脚么亦是勒浪痛，阿是？
三姐：到倷屋里去坐歇啊？
周陆氏：去坐歇让。
三姐：阿就要开嘎？
周陆氏：就要开关！两句闲话喂！
三姐：哦。
周陆氏：走让，搀倷一把哦。
三姐：嘬……劫生脚，烂脱俚，死人脚，断命脚，劫生脚……
周陆氏：当心！喔唷，哎束来！
三姐：嘬……
周陆氏：到哉，到哉。
三姐：就是倷屋里啊？
周陆氏：说得出格来！我屋里什梗大嘎？东家屋里！
三姐：哦，东家屋里哦。
周陆氏：咸。
三姐：格么倷呢？
周陆氏：喏，伲男格么登勒该搭做门公该。
三姐：哦，男格做门公，倷是门婆？
周陆氏：门……咸，是呀。
三姐：倷阿有小囡格介？
周陆氏：一个伲子。
三姐：倒是蚊子喂！
周陆氏：（表）还有苍蝇来！（白）里向来让！
三姐：噢。嘬……哎呀！啥两只长凳大得啦？
周陆氏：哈呀，啥格长凳介？格个叫懒凳！
三姐：触光全新勿“烂”喂！
周陆氏：哎呀，名堂叫懒凳呀！轿板笃吃力哉，等勒浪横横，懒怕些，叫懒凳。
三姐：噢。格么啥体拿链条锁牢仔，亦勿会逃走该！
周陆氏：喏！生怕么拖来拖去，弄得顶横倒竖么勿登样该！
三姐：哦，叫懒凳。
周陆氏：叫懒凳。
三姐：哦。
周陆氏：进来让！
三姐：啊，还要进去啦？
周陆氏：咸。
三姐：啊呀呀，啊呀呀。
周陆氏：啥体介？
三姐：啥恩笃家人家特别得啦！
周陆氏：哪哼啦？
三姐：哪哼台子浪戳仔桌裙勒，哎呀，靠背浪才着马甲嘎？
周陆氏：喔唷，要死快，倷哪哼才勿懂格介？台子浪叫桌围，靠背浪叫椅披！
三姐：勿是马甲啊？
周陆氏：勿对嘎！哪哼弄仔马甲出来则。
三姐：哎呀，才是绸格，洒花惯！
周陆氏：自然，伲挨搭讲究喂。
三姐：啊呀呀，别人家人也呒拨着，恩笃弄到靠背浪向去。
周陆氏：嘿嘿，伲挨搭才什梗该。进来让！
三姐：还要进去啊？
周陆氏：咸，进来让！
三姐：嘬……哎呀！该条弄堂啥黑得啦？
周陆氏：勿叫弄堂，叫备弄！
三姐：备弄啊？
周陆氏：咸。
三姐：蓦腾赤黑哪哼走呢？
周陆氏：倷等歇哦！（表）周陆氏要紧过来，墙头洞里一只只大格栏盆，里向油加足勒嗨，一大把灯草。等到点阳么，澄亮则。（白）大娘娘，
三姐：啊？
周陆氏：阿是亮则？
三姐：咸，哪亮则，亮则。（表）叫啥一看栏盆里格灯草浪铺出来，灯草一把呀！朱三姐阿要肉痛啦！想我夜里点两根也肉麻，要掐脱一根得来，一把！而且格油浪铺出来！（白）恩笃家人家真真拆烂污！
周陆氏：哪哼啦？
三姐：油勒浪铺出来，灯草一把得啦？
周陆氏：咸，伲挨搭是什梗惯。
三姐：照恩笃什梗是，一日天四两油看上去勿够惯！
周陆氏：四两来，抹布浪带脱！四斤也勿够得来！
三姐：四斤也勿够得啦？
周陆氏：自然喂。
三姐：划一，我问倷，恩笃该家人家阿有几化人介？
周陆氏：倷问上住勒下住？
三姐：上住。
周陆氏：头两个。
三姐：下住呢？
周陆氏：头伲百！
三姐：要头伲百得啦？
周陆氏：咸。
三姐：划一，我问声倷看，
周陆氏：哪哼？
三姐：恩笃该家人家阿要吃豆腐嘎？
周陆氏：（表）贼生头里问起吃豆腐起来则，（白）有时巴倒要吃吃惯！
三姐：噢，有剩时恩笃也要吃豆腐嘎？
周陆氏：也要吃吃嘎。
三姐：托倷桩事体。
周陆氏：啥体介？
三姐：假使恩笃今朝想着吃豆腐么，挑挑我格阿哥。
周陆氏：阿哥啊？倷阿哥哪哼啦？
三姐：伲阿哥开豆腐店格呀！
周陆氏：噢，开豆腐店格！
三姐：勒浪桐桥西堍廿多家门面。
周陆氏：哦——
三姐：伲阿哥叫朱小溪呀。
周陆氏：噢，叫朱小溪。
三姐：喔唷，阿哥做两块豆腐好得来！
周陆氏：阿真格介？
三姐：刷白习嫩，收口甜津津。
周陆氏：阿是？
三姐：伲阿哥做格豆腐嫩是嫩得来！
周陆氏：噢！
三姐：丢勒嘴里吃起来覅用牙齿嚼格！
周陆氏：弹格牙齿格豆腐是也朆吃着歇过！
三姐：那么恩笃倘使要吃豆腐啊，
周陆氏：哦。
三姐：买得多，还肯送格来！
周陆氏：噢，还肯送格啦？
三姐：挑挑伲阿哥。
周陆氏：蛮好，记好勒里哦。
三姐：叫朱小溪哦！
周陆氏：叫朱小溪。
三姐：覅忘记哦。
周陆氏：有数脉则喂。
三姐：提点扣头拨倷好则喂。
周陆氏：喔哟，呵呵，晓得。
三姐：勿能忘记，摆勒心浪哦！
周陆氏：晓得则喂！
三姐：（表）到底自家人，虽然今朝搭阿哥斗气，呒嘛用，生意勒浪手脚半边，俚原要照应自家阿哥。倒喊尽管往里向来，俚也弄勿懂到啥场化去啊？（白）哪，昂到则介？
周陆氏：还浪里向呀。
三姐：还要进去啦？？？
周陆氏：还要进去来！
三姐：早晓得什梗，我走转去也磨样浪哉！
周陆氏：格是到底推诿勿少喽，走让，走让！走让！！
三姐：勿……我要转去哉。
周陆氏：哎呀，倷走让！
三姐：伲男格要转来吃夜饭，我勿高兴进去哉！
周陆氏：走让！
三姐：勿……我要转去哉！
周陆氏：（表）格么周陆氏啊，倷既然拿俚骗到仔该搭么，有心好，倷拿俚骗到仔里向让！咸，叫啥俚转念头，横竖拿倷骗到仔该搭则，勿怕倷犟！搭俚讲穿好则！（白）大娘娘。
三姐：哦。
周陆氏：呵，老实讲拨倷听，便船带倷去勒，情光热昏，瞎说，骗倷！
三姐：哦，倷吃饱咋？！别人家鸡眼，脚几化痛得来，倷啥体瞎说踢出介？
周陆氏：我搭倷说，伲大娘娘要倷格人！
三姐：恩笃大娘娘要我啊？
周陆氏：咸！
三姐：喔？恩笃娘娘要我格人啊？
周陆氏：娘娘要倷格人！
三姐：喔。
周陆氏：倷阿晓得挨搭啥场化？
三姐：该搭啥人家介？
周陆氏：南濠金夹里！
三姐：出老虎惯！
周陆氏：当心点哦！！
三姐：哦……
周陆氏：伲娘娘啥人啦？
三姐：恩笃娘娘啥人啦？
周陆氏：金大娘娘！
三姐：哎呀，雌老虎喂！
周陆氏：要吃耳光哦！
三姐：噢，要我格人啊？
周陆氏：咸！
三姐：噢，要我？
周陆氏：咸，问脱两句闲话。
三姐：我认也勿认得，搭我有啥讲头介？
周陆氏：勿要紧惯，问倷两句闲话喂！就好放倷走惯！
三姐：勿，我搭俚勿认得惯！
周陆氏：勿认得么，问倷两句闲话呀，走让！
三姐：我勿去！
周陆氏：走让！
三姐：（表）金大娘娘雌老虎格名气几化大得来！俚乡下女人阿要吓格啦，金大娘娘要我，（白）我随便哪哼勿去！
周陆氏：豪稍走让！
三姐：勿去！
周陆氏：走让！！
三姐：（表）拖勒绊么，俚往地浪向一困，（白）唉，随便哪哼勿去——
周陆氏：哎呀，走让——（表）哪么要死则喂，往准里浪一困呀。周陆氏转念头，勿要紧！好得里向女厨房粗使丫头勿少勒嗨！喊个把出来帮帮忙好则，对。曳直仔喉咙勒浪喊。（白）喂，阿姐妹子笃啊，出来个把人让，娘娘要个人，格个人勿肯进去，毫稍出来帮帮忙哎！
丫头笃：（表）倷“旺”一喊么，“啪啪啪”跳出来四个粗使丫头，拳头大，臂把粗。格豪能格大膀总归比我格腰还要扎蹦！勿啥做勒，才歇歇掀掀仙人担勒格注花头。娘娘要格个人，格个人勿进去，胆能格大！（白）嫂嫂！
周陆氏：哎！
丫头笃：（表）格种才是女人哦！（白）浪啥场化介？
周陆氏：喏，格个人呀！勿肯进去呀，帮帮忙让恩笃！
丫头笃：娘娘要俚，俚勿进去？
周陆氏：是呀，我一倌仔勿来事呀！
丫头笃：要死快哉，勿受人抬举。咸，我来听倷噢！（表）听听客气得来，请。格注能格断命请，性命也请脱格。请么倷搀俚手让！脚股骨浪“搭”一把！往里向拖格呀！（白）哎呀，我来请倷！
（表）往里向拖。一边阿要吓格啦，汪朗、汪朗喊救命么弄得一塌糊涂。还好，房厅浪格金大娘娘等等格个女人勿进来么，说芳兰倷去看看，覅去吓仔俚噢。别样呒啥，等歇要问俚闲话哦。格桩事体要十多年咋，一吓要勿肯讲嘎！芳兰带两个丫头，一达路浪出来。将近到中门跟首，只听见浪喊救命呀。喊恩笃覅吓俚，现在浪喊救命则！踏出来一看么，该死！倒喊拿格女人浪地浪向拖呀！等歇俚闲话还肯讲格啦！
芳兰：姊妹们，与我放手。
丫头笃：噢，晓得，放手，格么放……
芳兰：还不与我进去。
丫头笃：噢，格么豪稍进去吧。
（表）粗使丫头要紧回进去。芳兰对周青笃家小看看，隐隐然，把扇子哪哼？周陆氏歪歪嘴，勒俚衣裳管里。芳兰一看么，看见杏黄疏头还露出勒浪。对俚眼睛霎霎，倷归倷出去。周青笃家小出去。另外两个丫头要紧拿俚搀起来，身浪向搭俚拍拍干净，什梗一来俚胆大点笃。听见大家叫俚芳姑娘。说倷笃定哦，娘娘问脱两句闲话，倷就好转格。好说好话俚放心点。叫啥一达路进来，进中门。到房厅天井里，抬起头来一看么，说金大娘娘坐勒当中，倷上去见见。朱三姐一看，金大娘娘坐勒当中。娘娘格面孔蛮标致，鹅蛋脸。倒喊倷勿能细看，越看越怕！甩眼梢，小包眼睛，前夹胸挺起，腰凛直，两只手搭勒脚馒头浪么真真象老虎什梗一只！硬硬头皮上来，心里是寒哦。俚象拜菩萨什梗。
三姐：娘娘勒上头，我……（表）俚自家呒拨称呼则呀！勿知哪哼拨俚想出来，（白）我乡下堂客，（表）自家叫自家堂客。（白）见仔娘娘哉。
金张氏：（表）当我菩萨用场？象拜什梗。（白）大娘罢了，旁侧请坐。
三姐：大娘娘勒浪上头，勿敢坐该。
丫头：叫倷坐么坐则喂，覅客气则喂，坐让。
三姐：小姐倷坐。
丫头：要死快哉，哪哼叫我小姐格介？我勒里帮人家么，哪哼叫我小姐格介？
三姐：噢，恩笃才是丫头哦！
丫头：（表）倷倒有赏有罚，要么小姐，要么丫头！（白）坐让！
三姐：格么告坐咋！（表）身体要紧坐定。
丫头：喏，吃茶喏。
三姐：（表）倒用得着，刚正“汪朗、汪朗”喊救命，喊得喉咙口干得来！倒喊朱三姐一看么，金夹里格好能格茶碗几化讲究，翠绿颜色瓜柳式老式格盖碗啦，下头有茶托勒，上头有碗盖。哪么俚看见仔阿要讨厌！“接力郭落”趁俚心浪么，顶好弄格种大格荷花碗，来格四碗冷茶，“咕嘟咕嘟”格么煞克。盖头勒，下头还有茶托么阿要讨厌。统统才去光。叫啥格只茶碗拿到手里么，格个茶实在烫勿过。要扇得冷点，吃起来么爽气点。把扇子倒亦拿出来则。俚又勿晓得别人浪看俚把扇子。（演员扇扇子）
金张氏：（表）金大娘娘一看，亦来则，亦来则，亦来则。格扇坠“嚓……”浪甩。刚正登勒水墙门楼浪看得勿大清爽，最最好现在拿把扇子拿到手里看看，到底阿是玉蜻蜓。对。（白）啊，大娘！
三姐：是。
金张氏：手中的扇儿，可能借我一观呀？
三姐：噢，娘娘要看把扇子阿是啊？
金张氏：恩。
丫头：（表）戳拨勒半边丫头么，丫头要紧拿一拿。（白）娘娘，扇子喏。
金张氏：哦。（表）金大娘娘拿扇子接到手里。
三姐：（表）叫啥格朱三姐等到扇子脱手么，俚想着！哎呀！出事体则！格把扇子俚勿能看格。桐桥堍买格呀，行货扇子，十一个铜钿！一面小楷字，翻转来格张画是景阳岗武松打老虎呀！俚格绰号雌老虎呀，覅看见仔多心介！噢，倷晓得我雌老虎，倷景阳岗武松打老虎！倷喊武松骑勒我背心浪“贼拨贼拨”，覅板面孔介！死快，哪么僵则！叫啥俚两只眼睛戳牢仔金大娘娘勒浪看，阿有啥巴望格张画覅看见哦！哪是俚茶还敢吃格啦？格只茶杯拿勒手里，眼睛急出仔，阿有啥巴望覅看见哦，覅看见哦！
金张氏：（表）金大娘娘，扇子接到手里。趁自家心浪，最最好马上就看看格扇坠到底阿是蜻蜓！就看扇坠，勿大好，覅起疑心。假痴假呆，先拿把扇子来看看。扇子曳开来一看么，噢，扇子勿灵，行货扇子。一面小楷，才是印勒浪。关面是画，景阳岗武松打老虎。娘娘看仔，不介为奇。要看扇坠咋！格只手伸下去，一看！实头玉蜻蜓！金大娘娘一个忘形骸么，（白）吓！！
三姐：（表）倷“吓”么，俚一吓呀！一脱手么，格只叉杯“啪”！哪是僵哉！断命闯起祸来倒喊连一连伲来格！只茶碗去脱，面孔急得转色！（白）大娘娘，覅动气哦！该把扇子格路倒尸斡拨勒我，我又覅买！我要买刘海洒金钱格！杀俚个千刀定规说该把好！景阳岗武松打老……
丫头：老啥？
三姐：老……
丫头：老啥？！老啥？！！
三姐：老鼠。（表）俚也只好老鼠则。（表）倷痕脱俚哦，大娘娘倷痕脱俚哦！（表）哪是茶碗也打碎则喂，让我旧货摊浪淘着仔勒赔还恩笃吧。倷痕脱俚哦，痕脱俚哦！
金张氏：（表）娘娘看啥体啊？急得什梗样式。格浪向有点啥格名堂勒嗨？重新再来看看看。娘娘曳开来一看么，噢，景阳岗武松打老虎。别人家提我雅号雌老虎勒，俚算犯仔我格讳则，急得什梗样式。娘娘转念头，现在辰光勿勒格浪，最最要紧格扇坠！金大娘娘关照丫头，拿只茶杯扫扫脱，另外再送杯茶。哪是娘娘格把扇子还肯脱手格啦！面孔也有点两样则。（白）大娘。
三姐：大娘娘。
金张氏：你柄扇儿甚好！
三姐：痕脱俚，倷覅邓让！亦勿是我要，俚斡拨我格呀！
金张氏：你这扇坠哪里来的？
三姐：阿是要问甩勒甩嘎？
金张氏：恩。
三姐：（表）归心似箭，也呒拨心路搭倷讲，瞎说仔一声么拉倒。（白）旧货摊浪买该。
金张氏：（表）啥么事啊？！金夹里传家之宝，旧货摊浪买得着嘎？倷搭我去买买看！金大娘娘面孔毕板！俚格面孔，枇杷一面孔，一面光，一面毛，一板就板。（白）大娘。
三姐：是。
金张氏：这扇坠，乃是金家祖上传留之物——汉玉蜻蜓，遗失了一十六年了，哪里来的？从实讲来，如果不然，哼哼！送官究办！
三姐：啥嘎？阿是格只甩勒甩格是恩笃格么事啊？
金张氏：是啊。
三姐：传家宝贝啊？
金张氏：恩。
三姐：（表）要死快哉！有格种能格事体嘎？竹箱里要闶十多年，倒喊是俚笃格么事？要吃官司哉！断命龙船么懊老出来看格！我晓得昨日夜里格梦勿灵啦！我原想，被头洞里哪哼会得爬出来八只蟹？当仔横财，朆晓得横祸！恶咬一口，倒喊喊俚笃格么事！（白）哦，格只甩勒甩是恩笃嘎？
丫头：咸，金夹里格么事，倷啥场化来格，说让！
三姐：大娘娘，勿瞒倷说，格样么事我要来仔十多年则，要十六年则！
金张氏：（表）娘娘一听对嘎！我小官人出去仔是要十六年，年份对格！（白）哪里来的？讲啊！
三姐：格么我从实告禀。
丫头：快点讲让！落搭来格？
三姐：讲仔么阿有啥让我早点转去吧。
丫头：晓得则喂。
三姐：伲格男格要转来吃夜饭快则。
丫头：辰光还早勒嗨来！
三姐：俚格脾气来得格难弄，夜饭烧得晚仔点，等歇亦要寻相骂勒啥。
丫头：勿要紧格，倷快点讲让！
三姐：格么讲仔要让我转嘎！
丫头：有数脉则喂。啥场化来格啦？
三姐：我么爷娘家姓朱，
丫头：姓朱。
三姐：大家才叫我三姐，排行第三。
丫头：喔。
三姐：我格男格么姓毛，吃船浪饭格。
丫头：哦。
三姐：生意么一紧勿做，一紧浪外头赌铜钿。
丫头：呒聊煞该。
三姐：阿哥么俚开豆腐店该。
丫头：哦，开豆腐店。
三姐：叫朱小溪。
丫头：喔。
三姐：哪么我嫁得近么，原叫我三姐，爷娘家格姓朆脱该。
丫头：哦。
三姐：阿是要问格只甩勒甩格啦？
丫头：咸，快点讲让！
三姐：格么讲仔让我转去哦。
丫头：有数脉则呀，喔唷，烦得啦！
三姐：唉，大娘娘，听禀哦。
（唱）一双兄妹住山塘，
（白）伲格男格俚生意勿做，我喊俚到阿哥店里去，
丫头：哦。
三姐：俚勿肯呀。
（唱）勿肯到店里向去帮忙。
一向在外家勿顾，可怜我么女工针黹度时光。
伲阿哥名叫朱小溪，俚笃夫妻并无有后嗣香。
平生爱看名班戏，
（白）叫啥俚吃、着、嫖、赌才勿欢喜，欢喜看戏。
丫头：哦，欢喜看戏。
三姐：格年仔搭么，俚笃夫妻同年四十二岁，
丫头：四十二岁。
三姐：看夜戏转，
丫头：哦！
三姐：（唱）勒浪桐桥拾得一个小儿郎。
（白）叫啥勒浪桐桥堍，看见一个男宝宝。总桐桥扜勿知啥人家小姐坏则，
丫头：哦。
三姐：来勿及送到堂里么，就什梗拆烂污甩勒桥堍半边。
丫头：哦，后来哪哼呢？
三姐：格么伲阿哥阿是呒拨小囡啦！看见格男小囡么几化欢喜！
丫头：哦。
三姐：要紧抱到屋里来么，算自家格伲子该。
丫头：哦，算自家小辈则。
三姐：小倌恩身浪向么，格只甩勒甩格，叫啥？
丫头：玉蜻蜓。
三姐：勒浪小囡身浪。
丫头：哦，勒小囡身浪。
三姐：外势还包件大人格短衫，倒是绸格。
丫头：喔！
三姐：啊呀呀，小襟浪向格字写仔行寻行事。
丫头：噢，还有字啦？
三姐：格浪还有血迹勒嗨来。
丫头：喔！
三姐：哪么啥格字么伲才勿识格呀！
丫头：哦。
三姐：想意思么总是小倌恩格年庚八字。
丫头：咸……
三姐：勿是自家养么，伲阿嫂呒拨奶奶格呀。
丫头：对惯！
三姐：哪么吃哪哼弄法呢？
丫头：哦！
三姐：哪么格辰光我齐巧坏脱个女小娘恩，叫毛头，不过撒四日天，奶奶朆上棚来。
丫头：喔。
三姐：阿哥来喊我则呀。
丫头：哦，来喊倷则。
三姐：（唱）半夜三更喊我去，我么幸趋奶奶勿曾棚。
（白）叫我去饮奶该！
丫头：哦，叫倷去饮奶格。
三姐：哪么阿哥拿格件大人格短衫，还有格只甩勒甩格……
丫头：玉蜻蜓！哎呀，青肚皮啊倷啊！
三姐：一紧要忘记！格两样么事送拨勒我，算开奶钿。
丫头：喔。
三姐：一紧笃勒竹箱里呀，哪么今朝我出来看龙船么，看见别人家扇子下头才有甩勒甩么，我想着格只么事，我去绕勒扇子浪。
丫头：哦。
三姐：倒喊是恩笃该！
丫头：噢……
三姐：恩笃格么只好还恩笃喂！格么格只茶碗么勿客气哉，大家。
金张氏：（表）金大娘娘一听啥？格只玉蜻蜓勒浪小倌身浪，小倌身浪还有件大人短衫，上头还有勿少字。覅说得喂，格只玉蜻蜓勒浪小倌身浪，格小倌板是男人养勒外头格亲骨血。倒弄勿懂，既然格个小倌男人养勒外头，啥体勿送到屋里来，摆勒桐桥堍呢？娘娘转念头还勿要紧，就算男人不测么，还有小辈。格么看上去格个小倌总勒豆腐店里啊！格么我家当搭俚笃一人一半，小倌我要抱转来。问问看。（白）大娘。
三姐：是。
金张氏：如今这小孩童竟在何处？
三姐：啊呀呀，恩笃家人家哪哼脚脚搛格介？
丫头：哪哼啦？
三姐：问仔甩勒甩么问小囡，什梗讲到天亮也讲勿完惯！
丫头：哎呀！辰光早勒嗨呀，倷说让，小倌呢？
三姐：恩笃么早，伲格男格要转来吃夜饭，吃勿着夜饭要打格呀！
丫头：喔哟，勿碍格勒呀，讲让！小倌呢？
三姐：随便哪哼勿讲，我要转去哉！
丫头：我关照倷，倷识相点哦！勿讲勿让倷走嘎！
三姐：板要讲嘎？
丫头：快点讲！
三姐：格么小囡讲完仔要让我转嘎！
丫头：晓得则喂。
三姐：阿有啥覅想出花头咋！
丫头：快点讲，小倌呢？
三姐：小倌恩么，阿哥抱仔转来当自家伲子么，倷想俚笃四十二岁呒拨小囡，格个小囡阿要欢喜格啦？
丫头：咸……
三姐：一日到夜得牢仔，做生意也呒拨心路哉。
丫头：噢。
三姐：（唱）从此作事多颠倒，
（白）叫啥格日仔搭，
丫头：恩。
三姐：（唱）两间一批房子着得精当光。
（白）格日仔搭，伲阿嫂烧烧饭，一个勿当心，
丫头：哦。
三姐：“哄、啡”，一蓬烟，房子呒拨格则呀！
丫头：啥勒“哄、啡”，一蓬烟，房子呢？
三姐：烧饭倷阿懂啦？
丫头：懂惯！
三姐：“哄、啡”，一蓬烟，房子呒拨则呀！
丫头：啥勒：“哄、啡”，一蓬烟，房子么呒拨，房子哪哼会呒拨呢？
三姐：倷烧饭阿懂啦？
丫头：烧饭懂惯！
三姐：（作摩擦火刀火石动作）“哄、啡”，一蓬烟——
丫头：哦——戳怕火着脱格哉！
三姐：咸——格个字只好恩笃说，我勿敢说格！（表）俚倒喊为仔金大娘娘雌老虎勒，吓得火着格火也勿敢说！生怕犯讳！一蓬烟，房子呒拨则喂！
丫头：噢，火着脱格哉。格么后来哪哼呢？
三姐：后来是也覅去说俚，
（唱）伲阿哥发痴么呒收捉，姑嫂度日汰衣裳。
（白）日脚实在难过，过勿落哉！
丫头：哪哼？
三姐：格日仔搭倒巧则呀，
丫头：哪哼巧？
三姐：门口走过个人，
丫头：喔？
三姐：（唱）来仔山东姓徐茧绸客，将儿买去作后嗣香。
（白）山东茧绸客人姓徐，倒喊欢喜格小囡，
丫头：咸！
三姐：讲好拿小囡摆勒篮里向称，小倌恩几化重，拿银子称还伲几化，
丫头：哦！
三姐：小倌九斤六两，一百五十两银子，卖脱该。
丫头：噢，卖脱格咋？
三姐：咸——
（唱）屈指到今十六载，一去如今是信渺茫。
勿是偷来勿是盗，我么直心直肺直肚肠，
快点放我转山塘。
（白）讲完则喂，哪好让我转则喂！
金张氏：哦，噢~~~~（白）金大娘娘听完么，哎呀，哪么完结。我总当仔格个小倌勒豆腐店里，叫啥现在格个小倌已经卖脱哉！卖拨勒一个走过人，山东人姓徐，做茧绸生意格。山东场化几化大，姓徐格人几几化化，叫我啥场化去寻呢？娘娘实在坐勿牢，要哭出来则！立起身来，拿仔把扇子，往准里向“得……”
（表）倷往里向去么，芳兰有数脉，晓得娘娘去哭则。要劝劝哦！交代朱三姐倷坐坐哦，伲就来嘎。叫啥带仔丫头、阿妈、娘姨统统才往里向去，外头就剩俚一倌仔。哪三姐还敢走格啦？倘使一走，背后头追上来，伲勿见脱把茶壶！争也争勿明白！啥金夹里格人什梗腔调，哪也只能等则。叫啥金大娘娘一到房间里向，号啕大哭，哪是男人勿着杠，伲子也呒拨格则。哪么格家人家哪哼弄法呢？芳兰登勒半边要紧劝俚，旁观者清。说娘娘，倷阿听见格个女人说，小囡身浪，外头还包一件大人格短衫，绸格，格浪还有许多字。喊格个女人短衫拿得来，伲来看看看，作兴一看就好明白。大爷到底勒啥场化，是凶是吉，格个小囡哪哼道理。倷一哭倷完结则喂！格么娘娘说我才托仔倷吧。芳兰说什梗，格把扇子勿见得再还格个女人，不过倷娘娘也要拨一把扇子拨俚，搭俚对调，勿然难听相格，吃光别人家扇子，要出凶名声格。喊俚拿件短衫来么，倷娘娘总也要拨件衣裳拨俚，算搭俚对调格。说刚刚格个女人我看俚跌交跟斗，拨俚讲出去勿大好，拨十两银子拨俚。哎呀，娘娘说倷覅搭我来缠则，倷拨俚金子好则，勿关我事！我等倷回音！哪么芳兰马上开箱子么，要紧拿金大娘娘格扇子。金大娘娘格扇子才是好货。再去开箱子，拿件衣裳么，瞎猫拖死老虫，拿格包裹打开么，也朆看一看，玄色细纱格披风。哪么倷喊俚着仔么哪哼弄法呢？另外再拿十两银子么，带丫头、阿妈、娘姨出来。朱三姐一看，总算来则。
朱三姐：哦，恩笃来咋？
丫头：哦哟，等仔半日则阿是？
朱三姐：哦。
丫头：对勿住哦！
朱三姐：覅客气。
丫头：喏……格把扇子喏！
朱三姐：作啥介？
丫头：喏！倷把扇子伲娘娘要哉！搭倷调一把。
朱三姐：该把搭我调啊？
丫头：咸。看看看，落把好介？
朱三姐：自然格把好喂！
丫头：噢，倷倒识货该。
朱三姐：哪哼勿识货介。
丫头：大骨呢？
朱三姐：象牙惯。
丫头：小骨介？
朱三姐：檀香惯。
丫头：倷倒懂该。销钉呢？
朱三姐：紫铜惯。
丫头：金该！
朱三姐：金嘎？
丫头：自然。
朱三姐：拆烂污，恩笃金格弄到格浪向去啊？
丫头：格么就叫金夹里喂！
朱三姐：真真，哦……
丫头：扇坠啥么事介？
朱三姐：扇坠啊？
丫头：咸。
朱三姐：（表）倒俚齐巧识货格呀，琥珀格双桃！俚笃屋里贴隔壁啦，有爿刻图章店，好老格琥珀，批轻呒拨分量该！（白）懂惯！
丫头：啥么事介？
朱三姐：珀惯！！
丫头：要死快，拨倷一吓得来！啥么事喔？
朱三姐：珀惯！！
丫头：琥珀该！
朱三姐：咸，格个字只要恩笃说，我总归勿敢说该，勿敢说该。
丫头：喏，还有件衣裳勒里来！
朱三姐：作啥介？
丫头：喏，刚正倷阿是说格啦？小倌身浪向还有件大人短衫。
朱三姐：绸惯。
丫头：咸，哪么倷娘娘想拿转来看看看。
朱三姐：噢？
丫头：所以搭倷调一件。喏，该件喏，拨倷喏！
朱三姐：恩笃要，我拿得来好则啊！
丫头：覅喂！倒说拿倷衣裳！搭倷调一件哦！
朱三姐：格是真真也好煞则。
丫头：覅客气喂。
朱三姐：哦。
丫头：该搭还有十两银子。
朱三姐：啥体介？
丫头：娘娘说该，赔罪压惊该！
朱三姐：啥叫赔罪压惊？
丫头：（表）要死快，才勿懂格喏！覅搭俚多花头，（白）喏！为仔倷刚正跌仔交跟斗了，拨倷十两银子。
朱三姐：哪哼勒跌跟斗勒有银子格介？
丫头：喏，金夹里规矩！
朱三姐：哦，金夹里有什梗格规矩嘎？
丫头：咸！
朱三姐：哦，跌仔跟斗有十两银子嘎？
丫头：咸！
朱三姐：格么……等歇出去跌跟斗阿有格介？
丫头：哪是呒拨格咋！
朱三姐：哪呒拨格咋？
丫头：咸！
朱三姐：格么，格么我去则哦，短衫我送得来好则。
丫头：倷，倷，覅则喂！伲差个阿哥兄弟跟倷去拿好则。
朱三姐：哦，跟我去阿是？
丫头：咸。倷勿能汰嘎！勿能汰嘎！伲要字哦！
朱三姐：哦，勿汰阿是？
丫头：咸。
朱三姐：龌龊煞格让！
丫头：覅要紧惯！伲就要龌龊喂！
（表）芳兰马上关照看后门格金兴，顶能干则。搭金兴咬耳朵，说倷跟格个女人转去，送俚转去。还有件短衫去拿得来。千定千定噢！格个女人覅开箱子拿出来一看，百疙烂皱，格浪霉点行寻行市，觉得难为情，拿挡勿出去撮一把，覅拨俚撮哦！一撮金夹里家人家才要撮光嘎！尽龌龊、尽邋遢拿来！倷拿仔短衫，近段再去打听打听看，阿有介事，桐桥西堍有爿豆腐店，老板叫朱小溪，什梗长、什梗短。倷打听打听， 而且门堂子认认清爽。娘娘下来要格个人么，要倷去喊该。金兴有数脉则，倒喊拿朱三姐送到屋里向么，朱三姐去开箱子则。十六年则呀！格件短衫亦勿着格，翻勒翻，翻到箱子底下，拿出来一看么，定规百疙烂皱呀！格浪霉点行寻行市，俚倒勿客气让！拿仔只面盆倒要想去撮脱一把。
朱三姐：倷坐歇哦！
金兴：倷落搭去啊？
朱三姐：撮脱一把哦。
金兴：哦！对勿住！对勿住！！嚯哟，勿能撮嘎！（表）金夹里家人家拨倷撮光。（白）来……
朱三姐：哎呀，邋遢得来！
金兴：勿要紧惯！伲就要格点龌龊！咸——越邋遢越好！来让！
朱三姐：格么真真难为情煞！
金兴：勿要紧惯！
朱三姐：格么倷坐歇，我去喊碗馄饨来。
金兴：覅客气，覅客气！过日来，过日来。
朱三姐：哪么倷走好哦！
金兴：哦呀，过日会哦！
朱三姐：走好哦！
金兴：（表）踏出来，要认认场化哦！下来作兴要来看格！一看倒蛮好认该，门口两棵大树，树浪向两个绳圈圈，搭别人家汰衣裳，挂竹头用该。记好。芳兰关照我嘎，还要去打听一个朱小溪啦，勒桐桥堍。金兴一达路过来，到桐桥堍一看么，一开间一爿豆腐店。只看见里向一男一女两家头对脚背吃夜饭。男人勿知阿是叫朱小溪喂，最好问个信。不过问信年纪轻格人勿大晓得，年数长远，要十六年则呀！一看么，巧则！豆腐店斜角对过门前头坐个老太，金兴踏过来一看，格老太哪哼道理？五月里天气浪烘脚炉喏！一看两横头呒拨人么，掩勒掩过来。（白）好婆啊！呵呵。
老太：（表）格老太，烘脚炉。脚炉里向勿是炭墼，鸡倒也是鸡，俚养四只小鸡，张怕拨勒走过人踏煞么，俚养勒脚炉里，而且勿会闷煞格。年纪大则，眼瞎拉搭，也勿晓得啥人。（白）啥人啊？
金兴：好婆啊！阿我格声音也听勿出咋？
老太：（表）老太格脾气蛮飚格，哪俚板要听出来则。（白）双喜倌。
金兴：咸——好婆倷格耳朵实头灵格，赛过眼睛喏，双……喜呀！
老太：倷几时转来嘎？
金兴：（表）金兴转念头，我一紧勒里苏州喂！和声调。（白）昨日！昨日。
老太：作怕恩笃娘写信喊倷转格。
金兴：咸，姆妹喊我转格呀！
老太：格么哪哼我格伲子倒朆转？
金兴：（表）金兴想，我哪哼晓得呢？倷格伲子我哪哼晓得呢？和调么拉倒。（白）咸，是呀，我先转，俚慢转哦！
老太：作怕还有两只台脚勒阿是？
金兴：两……（表）绝！金兴人几化聪明！懂则喂，两只台脚么还有两只码头，伲子唱戏该，哪是灵！（白）咸，对格！还有两只码头，唱仔就要转格！
老太：该腔我伲子格喉咙哪哼？
金兴：好——嚯哟，格只喉咙是真真刮朗朗，越唱越好！一出《刀会》，一出《训子》，真真唱绝格哉！好！实头好！刮朗朗！
老太：倷阿是双喜倌？
金兴：双……双喜喂。
老太：勿对拉里则喂！
金兴：哪哼啦？
老太：我格伲子唱小旦格么，哪哼唱起大面来则呢？
金兴：哦……（表）要死快哉，太活络哉！（白）好婆啊！
老太：啊？
金兴：倷格伲子唱小旦么，我哪哼勿晓得呢！近来呒清头，好婆啊！转来仔说么覅去说俚哦！
老太：噢！
金兴：呒清头，夜里向么磨夜作，吃酒，格只喉咙去脱。
老太：啊呀呀。
金兴：哪么改唱大面。
老太：哦。
金兴：咦！叫啥注得俚吃格碗饭呀！唱仔大面倒喊来得格灵呀！
老太：哈……
金兴：来得格灵！嘿嘿。覅去说俚哦！
老太：改唱大面则？
金兴：是呀！（表）金兴转念头，我要问问俚哉，在让俚问下去，我要拨俚逼煞哉！（白）好婆啊！
老太：啊？
金兴：我问声倷看，斜角对过豆腐店里，一男一女勒吃夜饭，格个男人啊，阿是叫朱小溪啊？
老太：蛮准。
金兴：是嘎？
老太：噢，倷提起格杀千刀我就胃气痛。
金兴：哪哼啦？
老太：格路倒尸过歇象煞有介事，穷格辰光才忘记。
金兴：哦。
老太：今朝俚烧南瓜，家家人家才派一碗，就剩该正我搭呒拨！
金兴：噢！
老太：俚晓得我顶欢喜！杀俚个千刀，是俚，是俚，是俚。
金兴：哦，是叫朱小溪。格么好婆啊，阿有介事十六年前，俚看夜戏回转来，桐桥堍拾着格伲子，阿有介事啊？
老太：倷哪哼晓得格？
金兴：好婆倷倒猜猜看喏，我哪哼晓得格喏——
老太：覅猜得惯！
金兴：哪哼？
老太：恩笃娘讲拨倷听格。
金兴：咸！是呀，姆妹讲拨我听格呀！勿然我哪哼晓得呢！
老太：倷阿晓得恩笃娘哪哼晓得格？
金兴：姆妹哪哼晓得啦？
老太：我讲拨恩笃娘听格。
金兴：便介啦！！阿是好婆讲嘎！勿然姆妈哪哼会晓得呢。
老太：有介事格。
金兴：噢，有介事嘎？
老太：恩，小囡抱到屋里向，横浪横浪，喊老娘，假装肚里痛，当别人死人。
金兴：哦！
老太：关伲啥体！有介事格。
金兴：哦，有介事该！（咕白）对格，朆瞎说。（白）哦，格么阿有介事，后来小倌进仔门么，一家人家弄得七颠八倒，豆腐店么烧脱勒，朱小溪么发痴勒，阿有介事啦？
老太：倷哪哼晓得格？
金兴：好婆倷倒猜猜看喏，我哪哼晓得格喏——
老太：总恩笃娘讲惯！
金兴：咸，是呀，姆妈讲格呀！
老太：倷阿晓得恩笃娘哪哼晓得格？
金兴：姆妈哪哼晓得格？
老太：我搭恩笃娘讲格。
金兴：噢！亦是倷好婆说嘎！对则，对则！
老太：有介事该，喔唷，发仔痴，横浪横浪喊，银子烧氧哉，银子烧氧哉。
金兴：哦！
老太：有介事格，有介事格。
金兴：哦，有介事该！（咕白）倒亦对格。（白）哦，有介事格。格么阿有介事后搜来格日脚实在过勿落勒，拿格小倌卖脱格。卖拨勒一个走过人，山东人，姓徐，做茧绸生意格。讲好，拿格小倌摆勒羹篮里称，一百五十两银子！好婆啊，阿有介事啊？
老太：倷哪哼晓得格？
金兴：我么伲姆妹讲惯！
老太：恩笃娘哪哼晓得格？
金兴：姆妹么，总亦是倷好婆说惯！
老太：勿对拉里！
金兴：哪哼啦？
老太：倷阿是双喜倌？
金兴：双喜喂！
老太：小囡摆勒篮里称，九斤六两重，一百五十两银子，我也勿晓得么，恩笃娘哪哼晓得格呢？
金兴：格个……（表）哪么要死哉！俚也勿晓得，哪哼晓得格呢？格么金兴啊，倷闲话问着要走么，倷回头声俚让！俚转念头，横竖我要问格才问着则喂，快点走吧！叫啥别转身来，往准关面，“哈达……”
老太：双喜倌啊，我也勿晓得么，恩笃娘哪哼晓得格呢？双喜倌啊……双喜啊！！！！（表）老太阿要吓格啦！呒拨声音则呀！一想么，勿是双喜倌！掩门贼！晓得我昨日摇着一脚会，三十千铜钿，现在先来看看脚地，今朝夜里要动手则！我原说我伲子哪哼唱起大面来则，是勿对则喂！
（表）老太马上关照里向媳妇，说今朝夜里向大家覅困哦，防防，看上去贼要来偷则！害格老太一夜天朆困呀，才是金兴害人呀！汗衫拿转去，哪么娘娘关照元宰详诗，看龙船告一段落。
