开口梦

致豹头

我钟意同我嗰啲薯薯哋嘅朋友 企喺地堂或池塘边边谂下偈仔。 谂下点至可以行出间细细学园 行到大马路转左到桔街再转右。 我哋会嗍到丝湿嘢游荡食燥嘢 跟住食两文鸡酸嘢去游下船河。 钓下墨鱼仔同埋啲生春嘅虾姑 开几樽菠萝啤瞓喺船发开口梦。 千祈冇以为梦里就冇间细学园 我哋一样仲係要谂下偈仔偷鸡。 先擒上樖龙眼树再擒落树菠萝 鼠一声扽落到大马路嘅坑渠边。 我哋转右揾飞发佬飞个屎塔盖 然之后转左到榨粉巷食烧鹅濑。 我唔係几想打机想去睇下女仔 但估到女仔会同我讲你望咩望。 于是乎就坐喺笨象公园搲搲痕 倾一啲啲心事起身拍一下啰柚。 行咗成个日头我哋都未畀人拉 若果喺学园大家经已晚紧自修。 不过就嚟冇晒钱冇得食麦当劳 就食咗杯车仔面玩波珠折飞机。 玩到好攰时瞌眼瞓喺张凳瞓着 唉梦入便间细学园变得好Q大。 几只死人头拉住我塞嘢入我口 我啲朋友都畀老师韫晒喺车房。 等到卒之跑得甩顾唔上朋友仔 我企喺大马路唔知转左定转右。 瞇埋双眼似虫咁行咗一小段路 嚟到一处我从来未恨过嘅地方。 呢度有好多我咁大嘅细路劳动 佢哋搬重嘢搬到踢晒脚又拗柴。 嗱嗱临先行开但又唔係好识路 个老师望见到我叫我快行埋嚟。 老师啲药油味好晕佢把声好恶 㧬我入人堆同大家一起做劳动。 我谂我就嚟醒喇因为几顶唔顺 人哋拍下我话冇咁容易㗎你话。 搬起嚿大石咯我好挂住啲朋友 畀我翻得翻去我唔会撇你哋走。