瞎写写

有段辰光呒没哪能弄上海闲话了。今朝兴致来了，写眼物事。

最近勿晓得哪能，网浪向又查到了世界语搿只关键词，就顺藤摸瓜，加深对搿方面个了解程度。世界语传到中国也有交关年数了，早期有勿少名人推广过搿门人造语言，也翻译过交关文学作品。不过到廿一世纪，搿门语言个影响力越来越有限了。网高头讲，现在辣中国，也只有百把人好熟练用世界语交流。

从搿现象也可以看出，现在世界语辣中国是一门比较冷门个语言。可能学习个难度并呒没想象个低，也可能应用个场景机会也老有限个，呒没多少人愿意花辰光去钻研搿门语言。诶，大部分个人学习一样物事侪是要看伊个经济价值个。不过闲话讲转来，搿百把个世界语顶级拥护者，也可以体验一种别样个经历，用一种别他人勿懂个语言辣小圈子里向交流。世界语就是搿只小圈子个护照。

除脱世界语，我也查了其它人造语言个信息。也有部分人造语言也形成了自家内部个小圈子。寻得着学习个资料，也有得拥护者去翻译，改进，优化。写到搿搭，我辣末生头有了一种浪漫个感觉。因为人造语言个学习可以讲并呒没办法拨学习者带来经济高头个收益。虽然搿能，也存在极少数个人愿意花辰光去了解钻研，并且学有所成，搿让我觉着是难能可贵个。

可能搿眼极少数个人学习个目的并勿单单是为了去交流。而是作为一种尝试，单纯个去尝试学习，看看叫自家可以学到啥程度。可能搿眼极少数个学习者本身就是孤独个人，伊拉拿学习个语言作为自家个一位朋友看待。辣我个概念里向，能学有所成个人，最一开始就像煞是一个辣发掘金矿个人，伊并勿晓得地底下头到底有金矿伐，就搿能挖啊挖。

真个，就算地底下头呒没金矿，伊拉应该也勿会得觉着老可惜伐，因为挖个过程本身对伊拉来讲就是值得个。